قازاقستاندىق سپورتشى ۇلى بريتانيادان ساياسي باسپانا سۇرادى

استانا. KAZINFORM – اقتاۋلىق سپورتشى، گيننەسستىڭ رەكوردتار كىتابىنا ەنگەن يلدار ياگيايەۆ ۇلى بريتانيادان ساياسي باسپانا سۇراعانىن ايتتى.

Instagram/ildar_calisthenics
Instagram/ildar_calisthenics

NewTimes.kz اقپارات اگەنتتىگىنە بەرگەن سۇحباتىندا يلدار مۇنداي قادامعا سوڭعى كەزدەرى قوقان-لوقى كوبەيىپ كەتكەندىكتەن باردىم دەپ وتىر. دجيۋ-دجيتسۋ شەبەرى وسىدان ەكى جىل بۇرىن انگلياعا ءناپاقا تابۋعا اتتانعان.

«ساياسي باسپانانى قورعانىس رەتىندە سۇرادىم. سەبەبى بۇعان دەيىنگى مالىمدەمەلەرىمنەن سوڭ مەنىڭ تاراپىما ءتۇرلى قوقان-لوقى ايتىلا باستادى. ءبارى شىلدە ايىندا – ب ا ق- تا تانىمال سپورتشى انگلياعا ورامجاپىراق تەرۋگە كەتكەنى تۋرالى اقپارات پايدا بولعان ساتتە باستالدى. وسىدان سوڭ ءتۇرلى نومىرلەردەن حابارلاسىپ، الەۋمەتتىك جەلىلەردە جازىپ، ءتىپتى بەيتانىس ادامدار ءۇيىم مەن جۇمىسىما دا ىزدەپ بارعان»، - دەدى يلدار ياگيايەۆ.

يلداردىڭ ايتۋىنشا، انگلياداعى ەكى جىلدا ول بىرنەشە رەت جۇمىس اۋىستىرعان، ال باستاپقى كەزدە شىنىمەن دە القاپتا جۇمىس ىستەپ اقشا تاپقان.

«فۋتبول ماتچتارىندا ستيۋارد بولدىم، ماكدونالدستا جۇمىس ىستەدىم. ءبىراق زاڭسىز جۇمىس ىستەۋ قيىن. ساياسي باسپانا بەرگەن بويدا دۇرىستاۋ جۇمىس قاراستىرامىن، سەبەبى قازاقستاندا تەز تاماقتانۋ جەلىلەرىندە ديرەكتور بولىپ قىزمەت اتقارعانمىن»، - دەپ قوستى ول.

يلدار انگلياعا 2023-جىلى كەتكەن. دەگەنمەن قارا جۇمىس ىستەپ ءجۇرىپ تە سپورتتى تاستاماپتى. 2024-جىلعى ساۋىردە ءتىپتى گرەپپلينگ پەن دجيۋ-دجيتسۋدان ۇلى بريتانيا چەمپيوناتىندا توپ جارعان.

سوڭعى جاڭالىقتار