قازاقستاندىق سۋرەتشىلەردىڭ تۋىندىسى ۆەنەتسيا بيەننالە كورمەسىنە قويىلادى

استانا. KAZINFORM - بيىل وتەتىن 60- ۆەنەتسيالىق ونەر بيەننالەسىندە قازاقستاننىڭ پاۆيلونى بولادى. كورمەگە وتاندىق بىرنەشە سۋرەتشىنىڭ تۋىندىلارى قويىلادى.

ۇيىمداستىرۋشىلاردىڭ ايتۋىنشا، ۆەنەتسيادا «Jeruiyq» دەگەن اتاۋمەن ەلىمىزدىڭ زاماناۋي سۋرەت ونەرى تۋىندىلارى ۇسىنىلادى. Jeriyq - ىزدەنىس پەن جول مەتافوراسى تۋرالى قازاق اڭىزدارىنان الىنعان ۋتوپيا. ەكسپوزيتسيالاردىڭ باعىتى - فۋتۋريستىك.

«ۆەنەتسيالىق بيەننالەگە قاتىسۋ ەلىمىز ءۇشىن وتە ماڭىزدى، ويتكەنى ول حالىقارالىق دەڭگەيدەگى بەدەلدى ءىس- شارا. قازاقستاننىڭ ءوز پاۆيلونى بولادى، ءبىز ونى جالعا الامىز. ءبىزدى دەمەۋشىلەر، مەتسەناتتار قولداپ وتىر، شىعىنداردىڭ نەگىزگى بولىگىن سولار جابادى. بيۋدجەتتەن قارجى قاراستىرىلماعان، مينيسترلىك كورمەگە قاتىسۋدى اقپاراتتىق جانە باسقا جولدارمەن قولدايدى»، - دەدى كورمە كۋراتورى داناگۇل تولەپباي 60- ۆەنەتسيا ونەر بيەننالەسىندە قازاقستاننىڭ كورمەسىن ۇيىمداستىرۋعا وراي وتكەن باسپا ءسوز ءماسليحاتىندا.

ەكى جىلدا ءبىر وتەتىن حالىقارالىق كورمەگە ەلىمىز رەسمي ەكىنشى جىل قاتىسقالى وتىر.

«2000 -جىلداردىڭ باسىندا قازاقستاندا زاماناۋي ونەر اسا جوعارى دەڭگەيدە بولمادى، قازىر بىزدە تاجىريبە جەتكىلىكتى. وتاندىق سۋرەتشىلەردىڭ كەيىنگى بۋىنى شەتەلدە ءبىلىم الىپ، حالىقارالىق دەڭگەيدەگى كورمەلەرگە قاتىسىپ جاتىر. قازىر ءبىز مادەنيەتىمىزدى كورسەتۋ ءۇشىن شەتەلدىك ارىپتەستەرىمىزگە جۇگىنبەي- اق ءوزىمىزدى ۇسىنۋعا دايىنبىز»، - دەدى كورمەنىڭ تاعى ءبىر كۋراتورى ءانۋار مۇسىرەپوۆ.

60-ۆەنەتسيالىق ونەر بيەننالەسىندە قازاق سۋرەت ونەرىنىڭ كورمەسى بيىل 20 -ءساۋىر مەن 24-قاراشا ايى ارالىعىندا وتەدى. وعان وتاندىق سۋرەتشىلەر كاميل مۋللاشيەۆ، ەربولات تولەپباي، ساكەن نارىنوۆ، The2vvo توبى (لەنا پوزدنياكوۆا، ەلدار تاگي)، سەرگەي ماسلوۆ جانە انۆار مۋسرەپوۆتىڭ تۋىندىلارى قويىلادى.