قازاقستاندىق قىز جەڭىپ العان ەكى تيتۋلدىڭ الەمدىك بوكستاعى بەدەلى قانداي؟
استانا. KAZINFORM - كاسىپقوي بوكستان جەڭىل سالماقتا ونەر كورسەتەتىن قازاقستاندىق انگەلينا لۋكاس (9-1، 4 ك و) WIBF جانە WBF چەمپيوندىق بەلبەۋلەرىن يەلەنگەنىن جازعان ەدىك.
بويجەتكەن بوكسشىنىڭ ءوزى دە الەم چەمپيونى اتانعانىن جاريا ەتىپ، وقىرمانىنان ءسۇيىنشى سۇرادى. ال بوكستا بۇل اتاقتار قانداي مارتەبەگە يە؟ الەم چەمپيونى دەپ اتاۋعا كەلە مە؟ بۇل تيتۋلداردىڭ كاسىپقوي بوكس الەمىندەگى ورنىنا توقتالىپ ءوتۋدى ءجون سانادىق.
WBF جانە WIBF- تى بوكستاعى نەگىزگى تيتۋل دەي المايسىڭ. ەرلەر بوكسى سەكىلدى ايەلدەر بوكسىندا دا ءتورت نەگىزگى چەمپيوندىق تيتۋل بار، ولار: WBA ،WBC ،WBO ،IBF. تاعى بەسىنشىسى بار: IBO - ول ابسوليۋتتى الەم چەمپيونى اتاعى ءۇشىن قاجەت ەمەس، ءبىراق جۇلدىزداردىڭ بارىندە بۇل بەلبەۋ بار.
سونىمەن، WBF- كە توقتالايىق.
World Boxing Federation- ءنىڭ كەڭسەسى ليۋكسەمبۋرگتە ورنالاسقان. ەرلەر اراسىندا بۇل اتاققا قول جەتكىزگەندەردىڭ اراسىندا كوپشىلىك ءۇشىن گەرمانيالىق شەفات يۋسۋفيدىڭ ەسىمى عانا بەلگىلى (2019-جىلى ول WBO چەمپيونى بيللي دجو سوندەرسپەن جۇدىرىقتاسقان).
قىزدار اراسىندا جاعداي ءسال دۇرىستاۋ: WBF اتاعىن يەلەنگەندەر تىزىمىنەن كلارەسسا شيلدستىڭ ەسىمىن كورۋگە بولادى (ءبىراق شيلدستىڭ ورتا سالماقتا WBA ،WBC ،WBO ،IBF چەمپيوندىق اتاقتارى بار ەكەنىن ۇمىتپاۋ كەرەك). انگەلينا لۋكاس تا پاراقشاسىندا وزىمەن قوسا ءدال وسى شيلدستىڭ سۋرەتىن سالىپ قويدى.
ال، WIBF (Woman International Boxing Federation) كەڭەسى ماياميدە.
اببريەۆياتۋرالارى ۇقساس بولسا دا، بۇل ۇيىمنىڭ IBF- كە قاتىسى جوق. WIBF- تىڭ رەسمي سايتى دا دۇرىس جۇمىس ىستەمەيتىندىگى ءبىراز نارسەنى اڭعارتسا كەرەك.
وسىناۋ ەكى بىردەي تيتۋلىنا قاراماستان، لۋكاس ماڭىزدى سانالاتىن WBC رەيتينگىندە 16-ورىندا عانا تۇر.
سويتە تۇرا لۋكاستىڭ ءوزى ايقاس الدىندا Instagram-دا بىلاي جازىپ ەدى:
«WIBF نۇسقاسى بويىنشا الەم چەمپيونى اتاعىن يەلەنۋ ءۇشىن دايىندالدىم. ءبىراق كەشە بانگكوككە WBF پرەزيدەنتى ۇشىپ كەلىپ، جەكپە-جەكتە WBF نۇسقاسى بويىنشا الەم چەمپيونى اتاعى دا ساراپقا سالىناتىنىن مالىمدەدى. ءوزىمىز دە تاڭعالدىق. جاراتۋشىنىڭ وسىنداي مۇمكىندىك بەرگەنىنە العىسىم شەكسىز.
ايتپاقشى، بۇل تيتۋلعا ابسوليۋتتى الەم چەمپيونى كلاريسسا شيلدس يە. ەرتەڭ WIBF جانە WBF بەلبەۋلەرى ساراپقا سالىنادى. بۇل ابسوليۋتتى الەم چەمپيونى اتاعىنا قاراي باعىت! ءوز اتىمدى تاريحتا قالدىرۋ ءۇشىن ءبارىن جاسايمىن».
ءبىراق باستى ستاتيستيكالىق سايت سانالاتىن BoxRec لۋكاس سوڭعى ناتيجەسىن تىزىمگە ەنگىزبەگەن.
ەستەرىڭىزدە بولسا، وسىدان ءبىراز بۇرىن بوكستان قازاقستانعا ەڭبەگى سىڭگەن جاتتىقتىرۋشى جۇمابەك ءومىرزاقوۆ انگەلينا لۋكاس پەن بالاۋسا مۇزدىماننىڭ كاسىپقوي بوكستاعى جولىنا قاتىستى پىكىر ءبىلدىرىپ، ەكەۋىنىڭ دە بولاشاعى جارقىن بولاتىنىنا كۇمان كەلتىرگەن ەدى.
«بالاۋسا مۇزدىمان مەن انگەلينا لۋكاستىڭ اۋەسقوي بوكستا دا، كاسىپقوي بوكستا دا بولاشاعى جارقىن دەپ ايتا المايمىن. ولاردىڭ قارسىلاستارىنىڭ كىم ەكەنىن قاراڭىز! اسىرەسە لۋكاستى قاراڭىز! بۇعان دەيىن قايداعى ءبىر «ءۇي بيكەسىمەن» توبەلەسىپ جەڭدى دە، ەندى ءدال سونداي بىرەۋىن تاعى تاۋىپ الدى. الەم چەمپيونى اتاعى ءۇشىن جۇدىرىقتاسپاقشى. قانداي الەم چەمپيونى، ونى قايدان تاۋىپ العان؟ تۇسىنىكسىز. وتكەندە پاكستاننىڭ بوكسشىسىمەن جەكپە-جەك وتكىزدى. پاكستاندا قىزدار بوكسى دەگەن اتىمەن جوق ەكەنىن بىلەسىز بە؟! سودان كەيىن الەم چەمپيونى اتاعىن جەڭىپ الدىم دەپ قالاي ۇيالماي ايتادى؟! شىنىن ايتۋ كەرەك، مۇزدىمان دا، لۋكاس تا ۇلكەن ناتيجەگە قول جەتكىزەدى دەپ ايتا المايمىن. قول جەتكىزۋ ءۇشىن الدىمەن اۋەسقوي بوكستا سەن تىم قۇرىعاندا قازاقستان چەمپيونى بولۋىڭ كەرەك. مەيلى، ادىلەتسىز بولسا دا سەن سول جاقتا ءوزىڭدى دالەلدەۋىڭ كەرەك»، - دەدى جۇمابەك ءومىرزاقوۆ.
