قازاقستاندىق مۇسىنشىلەر حالىقارالىق جارىستا جۇلدەگەر اتاندى
استانا. KAZINFORM - قازاقستاندىق مۇسىنشىلەر قىتايدىڭ جيامۋسى قالاسىندا وتكەن قار- مۇز فەستيۆالىنە قاتىسىپ، جەڭىمپازدار قاتارىنان كورىندى.
ءۇش ادامنان قۇرالعان قازاقستاندىق كوماندا ات ۇستىندە ساداق تارتقان قازاق باتىرىن مۇزدان ويىپ شىعىپ، قازىلار القاسىنىڭ وڭ باعاسىنا يە بولعان. قورتىندىسىندا، وتانداستارىمىز ءۇشىنشى ورىننان كورىندى.
ايتا كەتەيىك، حالىقارالىق مۇز ويما دوداسىنا قازاقستان، قىتاي، رەسەي، موڭعوليا، مەكسيكا جانە مالايزيا سياقتى 10 ەلدەن 30 عا جۋىق ءمۇسىنشى قاتىسىپ، 4 كۇندە تۋىندىلارىن مۇزدان ويىپ شىقتى.
قازاقستان كومانداسىنىڭ كاپيتانى جولداس ەرشاتتىڭ ايتۋىنشا، ولار حالىقارالىق فەستيۆالگە ارنايى شاقىرتۋمەن بارعان.
- بىزگە وسى فەستيۆالگە قاتىسۋعا ۇسىنىس ءتۇستى. ءبىز ويلانباستان كەلىسىپ، قىتايعا جول تارتىپ كەتتىك. قىتايدىڭ حەيلۋڭجياڭ پروۆينتسياسى قار- مۇز ونەرى مادەنيەتىنە وتە باي. سول سەبەپتى وسى دوداعا قاتىسۋ ءبىز ءۇشىن وتە جاقسى تاجىريبە بولدى. جالپى، ءبىزدىڭ كوماندا 2011 -جىلدان بەرى قالانى ساندەۋ جۇمىستارىمەن اينالىسىپ كەلەدى. ال 2015 -جىلدان باستاپ ەلىمىزدە مۇز قالاشىقتار سالۋ جانە مۇز ويما جاساۋ جۇمىسىن اتقاردىق، - دەدى.
ەرشاتتىڭ ايتۋىنشا، قازىلار القاسى قازاقستاندىق كوماندانىڭ مۇز تۋىندىسىن جوعارى باعالاعان.
- تۋىندىمىزدا اتپەن شاۋىپ بارا جاتىپ ساداق تارتقان قازاق باتىرى بەينەلەنگەن. سونداي- اق، تۋىندىنىڭ وزگەشەلىگى ءۇشىن قازاق اڭىزىنداعى قاناتتى بارىستى ويىپ شىقتىق. قازىلار القاسى جانە قىتايلىق كورەرمەندەر ءمۇسىندى جاقسى باعالاپ جاتتى، - دەدى كاپيتان.
استانالىق ءمۇسىنشى تالاپحان ازاماتتىڭ ايتۋىنشا، كوماندا كەلەسى جولى حاربيندەگى ۇلكەن فەستيۆالگە قاتىسۋدى جوسپارلاپ وتىر.
- وسى جەڭىسىمىزدەن كەيىن تاعى باسقا ۇسىنىستار تۇسە باستادى. چۋڭچيڭ قالاسىنداعى فەستيۆالگە شاقىرتۋ الىپ وتىرمىز. جالپى، كەلەسى جىلى حاربين قالاسىندا وتەتىن الەمگا تانىمال فەستيۆالدە ونەر كورسەتۋدى كوزدەپ وتىرمىز، - دەدى ازامات.
