قازاقستاندىق مۇعالىم الەمدىك جۇلدىزبەن حيت جازباقشى
استانا. KAZINFORM - قازاقستاندىق بيتمەيكەر Eraholic (اباي وبلىسىنداعى بيولوگيا ءپانىنىڭ مۇعالىمى ەرقانات سادۋحانوۆ) حالىقارالىق ارتىستەر جوباسىندا مۋزىكالىق مانساپ جاساماقشى. Dual Line-مەن ءساتتى ىنتىماقتاستىقتان كەيىن Eraholic بۇركەنشىك اتىمەن تانىمال بيتمەيكەر يسپاندىق جۇلدىز Rosalia-دان جۇمىس ىستەۋگە شاقىرتۋ الدى.
ونىڭ ايتۋىنشا، وعان «Bizcochito» جانە «Despecha» حيت اندەرىنىڭ ورىنداۋشىسى ءوزى حابارلاسقان. جەكە اڭگىمەدە ول ۇسىنىستى قابىلداعانىن، ءبىراق كەلىسىمشارتقا قول قويۋ پروتسەسى ۇزاققا سوزىلۋى مۇمكىن ەكەنىن ايتتى.
«روزاليا يسپان ءتىلدى ءانشى بولعاندىقتان، ءانىمىز لاتىن موتيۆىمەن، دالىرەك ايتساق، رەگگيتون جانرىندا بولۋى ابدەن مۇمكىن. بۇل جانر قازاقستانعا ەندى عانا ەنىپ جاتىر دەۋگە بولادى»، - دەدى ول.
روزاليا - 80-نەن استام ءتۇرلى مۋزىكالىق ماراپاتتارعا يە يسپان ءانشىسى. ولاردىڭ ىشىندەگى ەڭ ماڭىزدىسى - ەكى گرەممي مۇسىنشەسى. Spotify پروفيلىندە ءارتىستىڭ اي سايىن 24,5 ميلليونعا جۋىق تىڭداۋشىسى بار، ال ەڭ تانىمال ترەك - Despecha ءبىر ميللياردتان استام تىڭداۋ جينادى.
اۆتور
ەركەجان سماعۇلوۆا
