قازاقستاندىق ماماندار وزبەكستاندا سۋ ۇنەمدەۋ تەحنولوگيالارىن يگەرىپ جاتىر

تاشكەنت. KAZINFORM - قازاقستان مەن وزبەكستاننىڭ سۋ شارۋاشىلىعى ماماندارى سۋ ۇنەمدەۋ تەحنولوگيالارىن دامىتۋ بويىنشا تاجىريبە الماسىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

ايتا كەتەيىك، بيىل قاڭتاردا قازاقستان مەن وزبەكستاننىڭ سۋ شارۋاشىلىعى مينيسترلەرى ۇنەمدەۋ تەحنولوگيالارىن دامىتۋ ءۇشىن بىرلەسكەن سەمينارلار وتكىزۋگە ۋاعدالاسقان بولاتىن. سول كەلىسىمنىڭ نەگىزىندە قازاقستاندىق ماماندار تاشكەنتكە كەلىپ، وزبەك تاراپىنىڭ تىڭ تاسىلدەرىمەن تانىسىپ جاتىر.

- مۇندا ءبىز تاجىريبە الماسىپ جاتىرمىز. اتاپ ايتقاندا، سۋ ۇنەمدەۋ تەحنولوگيالارىن يگەرۋ پروتسەسى، ءتيىمدى تاسىلدەردى ەنگىزۋدى ۇيرەنۋ ۇستىندەمىز. بۇل رەتتە وزبەكستاندا سۋ شىعىنىن قىسقارتۋ بويىنشا قولعا الىنعان جوبالارمەن تانىستىق. وسى تەحنولوگيالاردى يگەرىپ، قازاقستاندا ەنگىزۋدى جوسپارلاپ وتىرمىز، - دەدى ق ر سۋ رەسۋرستارى جانە يرريگاتسيا مينيسترلىگىنىڭ تاريفتىك ساياسات دەپارتامەنتى ديرەكتورىنىڭ ورىنباسارى قانات ورالوۆ.

تاجىريبەسىمەن بولىسكەن وزبەكستاندىق مامان سابيدجون ماماتوۆ ورتالىق ازياداعى مۇزدىقتاردىڭ ەرۋ قارقىنى جوعارى ەكەنىن اتاپ ءوتتى. ونىڭ سوزىنشە، ايماق ەلدەرى بۇگىننەن باستاپ سۋ ۇنەمدەۋگە دەن قويعانى ابزال.

- وزبەكستان سۋ ۇنەمدەۋ تەحنولوگيالارىن ەنگىزۋگە ەرەكشە ءمان بەرەدى. ءبىز قازاقستاندىق ارىپتەستەرىمىزگە بۇل سالانى قالاي دامىتىپ جاتقانىمىز جايلى ايتىپ بەردىك. ءبىز قالاساق تا، قالاماساق تا ورتالىق ازيادا سۋ تاپشىلىعى بولادى. بۇگىنگە دەيىن مۇزدىقتاردىڭ %30 ەرىپ كەتتى. سوندىقتان قازىردەن قام جاساۋ ماڭىزدى. بۇل باعىتتا ەڭ ءتيىمدى ءتاسىل - سۋ ۇنەمدەۋ تەحنولوگيالارىن ەنگىزۋ، - دەدى ءور سۋ باسقارۋ ۇلتتىق جوباسىنىڭ مامانى سابيدجون ماماتوۆ.

ەسكە سالايىق، بۇعان دەيىن وزبەكستاندىق كومپانيالار قازاقستاندا سۋ ۇنەمدەۋ تەحنولوگيالارىن ەنگىزۋمەن اينالىسۋى مۇمكىن ەكەنىن جازىپ ەدىك.

سونىمەن قاتار بيىل قاڭتاردا وزبەكستاندىق ارىپتەسىمەن كەزدەسكەن ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ رەسمي استانا مەن تاشكەنت سۋ بولۋ كەلىسىمىنىڭ جوباسىن ازىرلەپ جاتقانىن ءمالىم ەتتى.

مۇنىمەن بىرگە، قازاقستان مەن وزبەكستان سىرداريا بويىنا سۋ ەسەپتەيتىن قۇرىلعىلار ورناتۋدى بيىل اياقتاۋدى جوسپارلاپ وتىر.