قازاقستاندىق مامان حالىقارالىق حوككەي فەدەراتسياسى كوميتەتىنىڭ قۇرامىنا ەندى
قازاقستاندىق ۆيكتوريا سازونوۆا حالىقارالىق حوككەي فەدەراتسياسىنىڭ ايەلدەر حوككەيىن دامىتۋ جونىندەگى كوميتەتىنىڭ قۇرامىنا ەنگىزىلدى.
ەندى ول ەلىمىزدىڭ اتىنان الەمدىك دەڭگەيدە وكىلدىك ەتەتىن بولدى، دەپ حابارلايدى Kazinform.
ۆيكتوريا سازونوۆا قازاقستان ايەلدەر قۇراماسىندا باس مەنەدجەر قىزمەتىن اتقارادى. ول - حالىقارالىق حوككەي فەدەراتسياسىنىڭ اتالعان كوميتەتىنە ازيا قۇرلىعىنان ەنگەن العاشقى مامان.
«مەن وسىنداي قۇرمەتكە يە بولعانىما قۋانىشتىمىن. بۇل-ۇلكەن جاۋاپكەرشىلىك. الداعى جۇمىسىمدا قازاقستاندىق حوككەيدى الەم جۇرتشىلىعى نازارىنا ۇسىنعىم كەلەدى. وسى ماقساتتا ابىرويلى قىزمەت اتقارامىن دەگەن ويدامىن»، - دەدى ۆيكتوريا سازونوۆا.
ۆيكتوريا مانسابىندا 20 جىلعا جۋىق حوككەيدەن قازاقستان ۇلتتىق قۇراماسىندا ويىن كورسەتتى. سپورتشى رەتىندەگى كارەراسىن 2013-جىلى اياقتاپ، 2022-جىلى الەم چەمپيوناتىندا ايەلدەر جاسوسپىرىمدەر قۇراماسىن باسقاردى. سول جىلدان باستاپ ايەلدەر قۇراما كوماندالارىنىڭ باس مەنەدجەرى، سونداي-اق قازاقستان حوككەي فەدەراتسياسىنىڭ ايەلدەر حوككەيىن دامىتۋ جونىندەگى ديرەكتورى قىزمەتىن اتقاردى.
2023-جىلعى الەم چەمپيوناتىندا ايەلدەر قۇراماسىنا جەتەكشىلىك ەتتى.
ەسكە سالساق، جاسوسپىرىمدەردىڭ قىسقى وليمپياداسىندا قازاقستان حوككەي قۇراماسى كىمدەرمەن وينايتىنى بەلگىلى بولدى.
