قازاقستاندىق كينوگەر لوندوندا توپ جاردى
لوندون. KAZINFORM - قازاقستاندىق كوركەم تۋىندى لوندوندا وتكەن ەۋرازيالىق فيلمدەر فەستيۆالىندە لاۋرەات اتاندى.
رەجيسسەر كاميلا ساعىنتقاننىڭ شىعارماسى «ەڭ ۇزدىك قىسقامەتراجدى فيلم» اتالىمى بويىنشا جۇزدەن جۇيرىك دەپ تانىلدى، دەپ حابارلايدى Kazinform نىڭ تۇماندى البيونداعى مەنشىكتى ءتىلشىسى عالىمجان قارامان ۇلى.
كاميلا ساعىنتقاننىڭ «تاۋەلسىزدىك كۇنى قۇتتى بولسىن» فيلمى سۇيگەن جارى باقيلىق بولىپ، ءومىردىڭ ءمانىن جوعالتقان ورتا جاستاعى ەر كىسى تۋرالى. ماراتتىڭ جاڭا قوعامعا كوڭىلى تولمايدى، ءبىراق ءتۇرلى كەدەرگىلەرگە قاراماستان تىعىرىقتان شىعۋدىڭ جولىن ىزدەيدى. وتاندىق ءونىم ساراپشىلار مەن كورەرمەندەردىڭ جوعارى باعاسىنا يە بولدى.
«فيلمنىڭ كوركەمدىك شەشىمى ءارى قىزىقتى مازمۇنى، قىسقا ۋاقىتتىڭ ىشىنە ءبىراز ماڭىزدى دۇنيەنى سىيعىزا العانى ۇنادى. ەكسپەريمەنتتىك ەلەمەنتتەرى دە كوڭىلدەن شىقتى. بايقاۋعا قاتىسۋشى باسقا باسەكەلەستەرىنە قاراعاندا وق بويى وزىق بولدى»، دەيدى قازىلار القاسىنىڭ مۇشەسى تيمۋر احمەدجانوۆ.
ەۋرازيالىق شىعارماشىلىق گيلدياسى كوممەرتسيالىق ەمەس ۇيىمى ۇيىمداستىرعان كينوفەستيۆال بيىل التىنشى رەت وتكىزىلىپ وتىر. وعان قاتىسۋعا 22 ەلدەن 100 گە جۋىق ۇمىتكەر نيەت بىلدىرگەن. ىشىنەن 20 سى ىرىكتەلىپ الىنىپ، بايگەگە ءتۇستى.
«ورتالىق ازيالىق كينوگەرلەردىڭ سەنىمدىلىگىنىڭ نىعايا تۇسكەنى سەزىلەدى. ولار شىعارماشىلىقتارىن شىڭداپ، باتىس كورەرمەنىنە ءبىر قادام جاقىن بولا ءتۇستى. ومىرىمىزگە باسقا قىرىنان قاراۋعا مۇمكىندىك بەرگەنى قۋانتادى»، دەيدى ساراپشى دجون فارندون.
كينوفەستيۆال جىل سايىن جۇزدەگەن تالانتتى رەجيسسەر، اكتەر، پروديۋسەر جانە ستسەناريستەردىڭ باسىن قوسادى. شارانى وتكىزۋدەگى ماقسات ەۋرازيالىق كينونى اعىلشىن ءتىلدى كەڭىستىكتە ناسيحاتتاۋ. ورتالىق ازيا جانە پوستكەڭەستىك كينويندۋستريا وكىلدەرىن دۇنيەجۇزىنەن جينالعان كاسىپقويلارمەن تانىستىرۋ.
«ۇلى بريتانيا حالقى بۇل فيلمدەردى ەشقاشان كورمەس ەدى. ويتكەنى بىزدە ورتالىق ازيا ونەر تۋىندىلارى ءۇشىن نارىق قالىپتاسپاعان. ءبىز بۇل ولقىلىقتىڭ ورنىن تولتىرعىمىز كەلەدى. شىعارماشىلىق ادامدارىن الەمنىڭ تۇكپىر-تۇكپىرىنەن جيناي العانىمىزعا ريزامىز»، دەيدى فەستيۆال ۇيىمداستىرۋشىسى سپەنسەر حوۋكەن.
ماراپاتتاۋ سالتاناتىنىڭ سىيلى قوناقتارى قاتارىندا لوندونداعى حاۆەرينگ اۋدانىنىڭ مەرى، ت م د مەملەكەتتەرى ەلشىلىكتەرىنىڭ وكىلدەرى بولدى. شارادا ۇلى بريتانياداعى قازاق ورتالىعىنىڭ وكىلى كامشات كۇمىسباي اۋەلەتىپ ءان شىرقادى. فەستيۆال ۇيىمداستىرۋشىلارى ونەر سۇيەر قاۋىمدى جۋىردا بۋرابايدا وتەتىن قىسقامەتراجدى كينونىڭ ءۇشىنشى حالىقارالىق بايقاۋىنا شاقىردى.
