09:55, 07 - قازان 2023 | GMT +5
قازاقستاندىق كاراتەشى دانيار ازيا ويىندارىنىڭ التىنى ءۇشىن تالاسادى
قىتايدىڭ حاڭجوۋ قالاسىندا ءوتىپ جاتقان ازيا ويىندارىندا قازاقستاندىق كاراتەشى دانيار يۋلداشەۆ فينالعا شىقتى، دەپ حابارلايدى قازاقپارات ءتىلشىسى.

الەم بىرىنشىلىگىنىڭ قولا جۇلدەگەرى، ەكى مارتە ازيا چەمپيونى د. يۋلداشەۆ 84 كەلىگە دەيىنگى سالماقتا ءۇش قارسىلاسىن جولدان تايدىردى.
قازاقستاندىق سپورتشى تايلاندتىق تيراپات كانابكايەۆتى 6:2، 2018 -جىلعى ازيا ويىندارى مەن الەم چەمپيوناتىنىڭ جۇلدەگەرى، تايبەيلىك چۋن ۆەي ۆۋدى 7:4 ۇتتى. سودان كەيىن جارتىلاي فينالدا يوردانيالىق، ەكى مارتە ازيا چەمپيونى موحاممەد ءالجافاريدى 4:0 ەسەبىمەن تىزە بۇكتىردى.
دانيار يۋلداشەۆ فينالدا مالايزيالىق بين اب ماليكپەن التىن ءۇشىن تالاسادى.
ەسكە سالا كەتەيىك، بۇدان بۇرىن ءجاميلا باقبەرگەنوۆانىڭ ازيا ويىندارىنىڭ كۇمىس جۇلدەگەرى اتانعانىن جازعان ەدىك.