قازاقستاندىق جاس شورتترەكشىلەر الەم كۋبوگى كەزەڭىندە قولا جۇلدەگەر اتاندى

لەۋۆاردەن (نيدەرلاند) قالاسىندا شورت-ترەكتەن ءوتىپ جاتقان الەم كۋبوگى كەزەڭىندە قازاقستان قىزدار قۇراماسى قولا جۇلدەگەر اتاندى، دەپ حابارلايدى Kazinform.

سپورتتى دامىتۋ ديرەكتسياسىنان ءمالىم ەتكەنىندەي، 3 مىڭ مەترلىك ەستافەتادا باق سىناعان قازاقستاندىق قىزدار مارە سىزىعىن ءۇشىنشى بولىپ قيدى.

اتالمىش دودادا ەل نامىسىن الينا اجىعاليەۆا، زەينەپ قۇمارحان،

اناستاسيا استراحانتسيەۆا، گۇلدانا جالمۇحان، پولينا ومەلچۋك قورعادى.

ەستافەتالىق جارىستا وڭتۇستىككورەيالىقتار جەڭىمپاز اتانسا، نيدەرلاند قۇراماسى كۇمىس جۇلدەگە يە بولدى.

شورت-ترەكتەن بقو قۇراماسىنىڭ اعا باپكەرى، قازاقستاننىڭ ەڭبەك سىڭىرگەن جاتتىقتىرۋشىسى ماكسيم لوزوۆويدىڭ ايتۋىنشا، باتىس قازاقستاندىق الينا اجىعاليەۆا ەرەسەكتەر اراسىندا دا سىنعا ءتۇسىپ كەلەدى. ول بيىل كانادانىڭ لاۆال قالاسىندا شورت-ترەكتەن وتكەن ءتورت قۇرلىق چەمپيوناتىندا قازاقستان قۇراماسى ساپىندا ونەر كورسەتىپ، قولا جۇلدەگە قول جەتكىزگەن ەدى.

ەسكە سالا كەتەيىك، بۇدان بۇرىن قازاقستان ايەلدەر قۇراماسىنىڭ شورت-ترەكتەن ءتورت قۇرلىق چەمپيوناتىندا ۇزدىك ۇشتىككە ەنگەنىن جازعان بولاتىنبىز.