قازاقستاندىق حيرۋرگتار وزبەكستاننان كەلگەن ناۋقاستارعا 17 كۇردەلى وپەراتسيا جاسادى
استانا. KAZINFORM - ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ 5 مامانداندىرىلعان بريگاداسىنان قۇرالعان توپ وزبەكستان رەسپۋبليكاسىنداعى قازاقستاننىڭ مەديتسينا كۇندەرى اياسىندا تاجىريبە الماسۋ ءۇشىن تاشكەنت قالاسىنا باردى.
ورتالىقتىڭ جەتەكشى حيرۋرگتارى 17 كۇردەلى وتانى ءساتتى وتكىزىپ، وزبەك ارىپتەستەرىنە ارنالعان ءبىرقاتار شەبەرلىك ساعاتتار وتكىزدى.
سونداي-اق، ا. سىزعانوۆ اتىنداعى ۇلتتىق عىلىمي حيرۋرگيا ورتالىعى مەن ۆ. ۆاحيدوۆ اتىنداعى رەسپۋبليكالىق مامانداندىرىلعان عىلىمي-پراكتيكالىق مەديتسينالىق حيرۋرگيا ورتالىعى اراسىندا ىنتىماقتاستىق تۋرالى مەموراندۋمعا قول قويىلدى.
قۇجات تاراپتاردىڭ بىرلەسكەن عىلىمي جوبالاردى دامىتۋعا، ماماندارمەن الماسۋعا جانە مەديتسينالىق كادرلاردىڭ بىلىكتىلىگىن ارتتىرۋعا باعىتتالعان.
- ساپار بارىسىندا پروفەسسور بولاتبەك بايماحانوۆ وزبەك ارىپتەستەرىنە قازاقستان ترانسپلانتولوگياسى مەن لاپاروسكوپيالىق حيرۋرگيا مەكتەبىنىڭ جەتىستىكتەرىن تانىستىرىپ، باۋىر ترانسپلانتاتسياسىنان كەيىنگى بيليارلىق اسقىنۋلار مەن ۇيقى بەزى-دۆانادتساتپەرستنايا ىشەك رەزەكسياسىنىڭ ناتيجەلەرى تۋرالى ءدارىس وقىدى. بۇل باياندامالار وزبەكستاندىق ارىپتەستەردىڭ زور قىزىعۋشىلىعىن تۋدىردى، - دەلىنگەن اقپاراتتا.
سونىمەن قاتار، قازاقستاندىق دارىگەرلەر تاشكەنت قالاسىنداعى ۆ. ۆاحيدوۆ اتىنداعى رەسپۋبليكالىق مامانداندىرىلعان حيرۋرگيا ورتالىعىندا جانە قارشى قالاسىنداعى رەسپۋبليكالىق كارديولوگيا ورتالىعىنىڭ فيليالىندا جۇمىس ىستەدى. قازاقستاندىق ماماندار گەپاتوبيليارلىق، ەندوسكوپيالىق، كارديوحيرۋرگيالىق جانە ەندوۆاسكۋليارلىق باعىتتار بويىنشا وتالار جاساپ، وزدەرىنىڭ جوعارى كاسىبي دەڭگەيىن جانە زاماناۋي ەمدەۋ تاسىلدەرىن كورسەتتى.
تاشكەنتتە گەپاتوپانكرەاتوبيليارلىق حيرۋرگيا ءبولىمىنىڭ مەڭگەرۋشىسى مەيرام دوسحانوۆ باۋىر مەن ءوت جولدارىنا لاپاروسكوپيالىق وتا جاساۋ بويىنشا ماستەر-كلاسس وتكىزىپ، كۇردەلى 4 وتانى ءساتتى ورىندادى.
ەرلان ابدراشەۆتىڭ جەتەكشىلىگىمەن ەندوسكوپيالىق حيرۋرگيا بويىنشا ماستەر-كلاستار وتكىزىلدى. ونىڭ بارىسىندا وڭەشتىڭ جاڭا تۇزىلىستەرىن ەندوسكوپيالىق رەزەكتسيالاۋ جانە پەرورالدى ميوتوميا وپەراتسيالارى جاسالدى.
رەنتگەنحيرۋرگيا جانە ينتەرۆەنسيالىق كارديولوگيا ءبولىمىنىڭ مەڭگەرۋشىسى ءادىل بايىمبەتوۆ جۇرەكشەلەردىڭ فيبريللياتسياسى بار ناۋقاستارعا كريوباللوندىق ابلياتسيا پروتسەدۋرالارىن جۇرگىزدى.
ەندوۆاسكۋليارلىق حيرۋرگ ە. ابيلحانوۆ 4 جوعارى تەحنولوگيالىق وتا جاسادى. ونىڭ ىشىندە قارىنشاارالىق پەردە اقاۋىن ترانسكاتەتەرلىك جابۋ جانە وكپە ارتەرياسى ستەنوزىندا باللوندى ۆالۆۋلوپلاستيكا وپەراتسيالارى بار.
كارديولوگيا ورتالىعىنىڭ قارشى فيليالىندا ورتالىقتىڭ كارديوحيرۋرگيا ءبولىمىنىڭ مەڭگەرۋشىسى باۋىرجان راقىشەۆ وزبەك ارىپتەستەرىمەن بىرلەسىپ 4 جۇرەك وتاسىن جۇرگىزدى. ولاردىڭ قاتارىندا ميترالدى قاقپاقشانى پروتەزدەۋ جانە سول جاق جۇرەكشەدەگى ميكسومانى الىپ تاستاۋ وپەراتسيالارى بولدى.
قازاقستاندىق حيرۋرگتار وتاندىق حيرۋرگيا مەكتەبىنىڭ جەتىستىكتەرىن جانە زاماناۋي ەمدەۋ تەحنولوگيالارىن تانىستىرىپ، وزبەك ناۋقاستارىنا دەنساۋلىعىن قالپىنا كەلتىرۋگە جانە ءومىر ساپاسىن ارتتىرۋعا مۇمكىندىك بەردى.
ورتالىقتىڭ دارىگەرلەرى بۇعان دەيىن تۇركىستان وبلىسىندا ەكىنشى رەت باۋىر ترانسپلانتاتسياسىن ءساتتى جۇزەگە اسىردى.
