قازاقستاندىق دوستارىمىزدى 9-مامىردا جەڭىستىڭ 80 جىلدىعىندا كۇتەمىز - ر ف پرەزيدەنتى
استانا. KAZINFORM - رەسەي مەن قازاقستان اراسىنداعى ءوزارا ارەكەتتەستىكتە گۋمانيتارلىق بايلانىستار ماڭىزدى ورىن الىپ وتىر. بۇل تۋرالى رەسەي فەدەراتسياسىنىڭ پرەزيدەنتى ۆلاديمير پۋتين قازاقستان رەسپۋبليكاسىنا كەزەكتى مەملەكەتتىك ساپارى اياسىندا «كازاحستانسكايا پراۆدا» گازەتىنە بەرگەن ماقالاسىندا ايتتى.
«ەكى تاراپ تا مادەنيەت، سپورت، قوعامدىق جانە جاستار اراسىندا، سونداي-اق ءبىلىم بەرۋ سالاسىندا ىنتىماقتاستىقتى كەڭەيتۋ ءۇشىن كوپتەگەن جۇمىس اتقارۋدا. رەسەيدىڭ جوعارى وقۋ ورىندارىندا شامامەن 60 مىڭ قازاقستاندىق ستۋدەنت وقىپ ءجۇر. ال قازاقستاندا لومونوسوۆ اتىنداعى ممۋ سەكىلدى جەتەكشى رەسەيلىك ۋنيۆەرسيتەتتەردىڭ فيليالدارى تابىستى جۇمىس تۇر. جاقىندا استانادا رەسەي سىرتقى ىستەر مينيسترلىگىنىڭ ماسكەۋ مەملەكەتتىك حالىقارالىق قاتىناستار ينستيتۋتىنىڭ فيليالى دا اشىلماق، ونىڭ تۇلەكتەرى اراسىندا تانىمال قازاقستاندىقتار، سونىڭ ىشىندە قاسىم- جومارت كەمەل ۇلى توقايەۆ تا بار»، - دەپ ەسكە سالدى ر ف پرەزيدەنتى.
سونداي-اق رەسەي پرەزيدەنتى كەلەسى جىلى قوس مەملەكەت ەكىنشى دۇنيەجۇزىلىك سوعىستاعى جەڭىستىڭ 80 جىلدىعىن اتاپ وتەتىنىن تىلگە تيەك ەتتى. وسى رەتتە ۆلاديمير پۋتين قاسىم-جومارت توقايەۆتى 9-مامىردا ماسكەۋدە وتەتىن اۋقىمدى ءىس-شاراعا شاقىردى.
«پرەزيدەنت توقايەۆتى جانە قازاقستاندىق دوستارىمىزدى 9-مامىردا ماسكەۋدە وتەتىن مەرەيتويلىق شارالاردا كۇتەمىز. رەسەيدە دە، قازاقستاندا دا حالىق اكەلەرى مەن اتالارىنىڭ ناتسيزمگە قارسى يىق تىرەسە كۇرەسكەن ەرلىگىن ۇمىتقان جوق جانە قۇرمەتپەن ەستە ساقتايدى. ال ءبىز، ارينە، بولاشاق ۇرپاق بەيبىتشىلىك پەن بوستاندىق قانداي باعامەن قورعالعانىن ەستە ساقتاۋى ءۇشىن بارلىعىن ىستەۋىمىز كەرەك. بۇل، اسىرەسە، تەڭ قۇقىقتى ىنتىماقتاستىققا نەگىزدەلەتىن جانە ەگەمەندى دامۋدىڭ جاڭا مۇمكىندىكتەرىن اشاتىن كوپپوليارلى الەمدىك ءتارتىپ قالىپتاسىپ جاتقان ۋاقىتتا ەرەكشە ماڭىزعا يە»، - دەدى رەسەي پرەزيدەنتى.
اۆتور
ايجان سەرىكجان قىزى
