قازاقستاندىق عالىمدار سمارت- ەلەكتروموتوتسيكل مودەلىن جاسادى

استانا. KAZINFORM - ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ جاس عالىمدارى قۋانىش جاقپايەۆ، جالعاس احمەتوۆ جانە انەت يبرايموۆ سمارت ەلەكتروموتوسيكل جاساپ شىعاردى.

جاس عالىمداردىڭ ايتۋىنشا، ولار ايگىلى «Harley-Davidson» مودەلىنە نەگىزدەلگەن ەلەكترلىك موتوتسيكل قۇراستىرعان. سمارت ەلەكتروموتوسيكلدى مۇمكىندىگى شەكتەۋلى جاندار دا وڭاي باسقارا الادى. بۇل كولىك ەكولوگيالىق تۇرعىدان تازا ءارى جۇك تاسىمالداۋعا دا قولايلى.

جوبانى تولىق ىسكە اسىرۋ ماقساتىندا عالىمدار كومانداسى «تاۋەلسىزدىك ۇرپاقتارى» بايقاۋىنا قاتىسىپ، گرانت جەڭىپ الدى.

قازىرگى تاڭدا ۋنيۆەرسيتەت عالىمدارى ەلەكتر ەنەرگياسىمەن جۇمىس ىستەيتىن ۇنەمدى جانە ىڭعايلى كولىك قۇرالدارىن وندىرەتىن سەح اشىپ، وتاندىق ءوندىرىستى دامىتۋعا ءوز ۇلەستەرىن قوسۋدا. بولاشاقتا بۇل ءونىمدى نارىققا شىعارىپ، ەلەكتر كولىكتەرىنىڭ باسەكەگە قابىلەتتىلىگىن ارتتىرۋدى جوسپارلاپ وتىر.

جەتىسۋ ۋنيۆەرسيتەتىنىڭ عالىمدارى الداعى حالىقارالىق ەلەكتر كولىك كورمەلەرىنە دايىندىق جۇرگىزىپ جاتىر.