قازاقستاندىق عالىمدار Horizon Europe گرانتىنا ءوتىنىم بەرە الادى
استانا. KAZINFORM - ەلوردادا نازاربايەۆ ۋنيۆەرسيتەتىندە قازاقستان تۇراقتى دامۋ شەشىمدەرى جەلىسىنىڭ (SDSN) ەكىنشى كونفەرەنتسياسى ءوتىپ جاتىر.
وندا قازاقستاندىق عالىمدارعا ەۋروپالىق وداقتىڭ كليماتتىڭ وزگەرۋىنە قارسى كۇرەسكە باعىتتالعان زەرتتەۋلەر مەن يننوۆاتسيالاردى قارجىلاندىرۋ جونىندەگى Horizon Europe گرانتتىق باعدارلاماسى تانىستىرىلدى.
ەۋروپالىق كوميسسيانىڭ عىلىمي-زەرتتەۋ جانە يننوۆاتسيالار جونىندەگى باس ديرەكتسياسىنىڭ وكىلى كرەمەنا ميليەۆا Horizon Europe باعدارلاماسى قازاقستاندىق عالىمدار مەن زەرتتەۋ ۇيىمدارى ءۇشىن اشىق ەكەنىن جەتكىزدى.
«باعدارلامانىڭ جالپى بيۋدجەتى شامامەن 100 ميلليارد ەۋرونى قۇرايدى جانە 7 جىلعا ەسەپتەلگەن. قازىر باعدارلاما ارالىق كەزەڭدە تۇر جانە 2027 -جىلعا دەيىن جالعاسادى. قازاقستاندىق عالىمداردىڭ كەلەسى ءۇش كەزەڭگە دايىندالۋعا جانە قاتىسۋعا ۋاقىتى بار. ارينە، ءبىز قازاقستاندىقتاردىڭ بۇل باعدارلاماعا كوبىرەك قاتىسقانىن قالايمىز»، - دەدى ك. ميليەۆا نازاربايەۆ ۋنيۆەرسيتەتىندە وتكەن SDSN كونفەرەنتسياسىندا.
عىلىم جانە جوعارى ءبىلىم مينيسترلىگىنىڭ «عىلىم قورى» ا ق «Horizon EuropE» باعدارلاماسىنىڭ ۇلتتىق ۇيلەستىرۋشىسى اتاندى.
«قازاقستاننىڭ عالىمدارى مەن عىلىمي ۇيىمدارىنا باعدارلاماعا قاتىسۋعا ەشقانداي شەكتەۋ جوق. كەز كەلگەن ادام قۇجاتتاردى تاپسىرا الادى. عىلىم قورى ءوز تاراپىنان وسى باعىتتا ۇلكەن جۇمىس جۇرگىزۋدە. الدىڭعى جىلى جانە بيىل بىزدە ءبىرقاتار ۆوركشوپتار ءوتتى. بۇگىن دە باعدارلاماعا قاتىسۋدىڭ نەگىزگى اسپەكتىلەرى تۇسىندىرىلەدى: ءوتىنىمدى قالاي بەرۋ كەرەك، قارجىلاندىرۋ پارامەترلەرى، ەرەكشەلىكتەرى، ەو- مەن سەرىكتەستەرمەن ىنتىماقتاستىق جايى تالقىلانادى. بۇل قازاقستاندىق زەرتتەۋشىلەر ءۇشىن وراسان زور مۇمكىندىكتەر اشادى»، - دەدى «عىلىم قورى» ا ق باسقارما ءتوراعاسى كاميل اقاتوۆ.
ونىڭ ايتۋىنشا، ءبىرقاتار وتاندىق عالىم Horizon Europe باعدارلاماسىنا ءوتىنىم بەرىپ ۇلگەردى.
ايتا كەتەيىك، 13-14-مامىر كۇندەرى كونفەرەنتسيادا بەلگيا، نيدەرلاندى، گەرمانيا، قازاقستان، قىرعىزستان جانە وزبەكستاننىڭ ساراپشىلارى مەن عالىمدارى ەكى كۇن ىشىندە ءبىلىم بەرۋ، قوعامدىق دەنساۋلىق ساقتاۋ، ەنەرگەتيكا، مەملەكەتتىك باسقارۋ، ۇكىمەتتىك ەمەس سەكتور سياقتى سالالاردا 2030 -جىلعا دەيىنگى تۇراقتى دامۋ سالاسىنداعى ۇلتتىق جانە وڭىرلىك دەڭگەيدەگى كۇن ءتارتىبىن ورىنداۋ قۇرالى رەتىندە لوكاليزاتسيالاۋ ماسەلەسىن تالقىلايدى.
