قازاقستاندىق بىتىمگەرلەر تاياۋ شىعىستا ءوز ميسسياسىن باستادى

استانا. KAZINFORM – ب ۇ ۇ تاياۋ شىعىستاعى تاۋەلسىز ميسسياسىن ورىنداۋ ءۇشىن قازاقستاننان اتتانعان اسكەريلەر سيرياعا امان-ەسەن جەتتى.

14- ناۋرىزدا 139 ادامنان تۇراتىن العاشقى ەشەلوندى الماتىدان سالتاناتتى تۇردە شىعارىپ سالدى.

15- ناۋرىزدا بىتىمگەرشىلىك كونتينگەنتتىڭ جەكە قۇرامى قر اۋە قورعانىسىنىڭ 295 كۇشىمەن ءۇش ۇشاقپەن داماسكىگە امان-ەسەن جەتتى. ارى قاراي الەمنىڭ ەڭ تۇراقسىز ايماقتارىنىڭ ءبىرى - گولان بيىكتىگىنە بەت الادى. بۇل ايماق داۋلى ايماق بولىپ سانالادى. ونىڭ كوپ بولىگى يزرايلدىڭ باقىلاۋىندا جانە شىعىس بولىگىندە شامامەن 600 شارشى شاقىرىم سيريانىڭ ىقپال ەتۋ ايماعىندا ورنالاسقان.

سيريا اۋماعىندا قازاقستاندىقتاردى جىلى قارسى الدى. جەرگىلىكتى تۇرعىندار قازاقستاننىڭ اسكەري كۇشتەرى تاياۋ شىعىس ايماقتارىندا ءتارتىپتى قامتاماسىز ەتۋ بويىنشا ەرەكشە جانە ماڭىزدى جۇمىس ءۇشىن ۇشىپ كەلگەنىن تۇسىنەدى.

اۋەجايدا ءتيىستى پروتسەدۋرالاردان ءوتىپ، باگاجدى تيەگەننەن كەيىن ءبىزدىڭ اسكەريلەر ب ۇ ۇ بازاسىنا بەت الدى.

جاقىن ارادا ءبىزدىڭ اسكەريلەر داماسكىگە بىتىمگەرشىلىك كۇشتەرىنەن بۇرىن جىبەرىلگەن تەحنيكا مەن قارۋ-جاراقتى قابىلدايدى.