ادەبيەت بويىنشا نوبەل سىيلىعى نورۆەگ جازۋشىسى يۋن فوسسەگە بۇيىردى
نوبەل كوميتەتى ادەبيەت بويىنشا ماراپاتتى شىعارمالارىندا سويلەۋ قۇقىعىنان ايىرىلعان ادامداردىڭ داۋىسىنا ەرەكشە نازار اۋداراتىنى ءۇشىن نورۆەگ اۆتورى يۋن فوسسەگە بەردى. قازاقپارات بۇل تۋرالى BBC- گە سىلتەمە جاساپ حابارلايدى.

فوسسە — قازىرگى زامانداعى ەڭ تانىمال جانە ەۋروپا تەاترلارىندا ەڭ سۇرانىسقا يە دراماتۋرگتەردىڭ ءبىرى.
تەاتر ساراپشىلارىنىڭ سوزىنشە، فوسسە شىعارمالارىنىڭ سيۋجەتىن كەيىپكەرلەردىڭ كۇشىنە ەمەس، وزىنە سەنىمسىزدىگى، ولىمنەن قورقۋى، ءوز كۇشىنە كۇماندانۋى سىندى ءالسىز تۇستارىنا نەگىزدەپ قۇرادى.
سول سەبەپتى دە ونىڭ پەسالارى تانىمال.
بۇل كۇماننىڭ ءبارى ادامدارعا تانىس، وسى جاعداي فوسسەنى سۇرانىسقا يە اۆتور ەتتى، دەدى شۆەد اكادەمياسىنىڭ وكىلدەرى جەڭىمپازدى انىقتاۋ سالتاناتىنىڭ سىرتىندا.
يۋن فوسسە العاش 1983 -جىلى «قىزىل، قارا» رومانىن جازدى، ال ونىڭ ەڭ العاشقى «ءبىز ەشقاشان ايىرىلىسپايمىز» پەساسى 1994 -جىلى جارىق كوردى.
ونىڭ دراماتۋرگ رەتىندە تانىمال جۇمىستارىنىڭ قاتارىندا «جازدىڭ ءبىر كۇنىندە» (1998)، «ءولىم تاقىرىبىنىڭ تۇرلەرى» (2001)، «مەن — جەل» (2007) جانە باسقالارى بار.
ەڭ تانىمال روماندارى — «تاڭ، كەش»، «ۇيقىسىزدىق» جانە باسقاسى.
بيىلعى ۇمىتكەرلەر قاتارىندا سالمان رۋشدي، حارۋكي مۋراكامي جانە مارگارەت ەتۆۋد سىندى تانىمال جازۋشىلار دا بولدى.
ولاردىڭ ءبارى ادەبيەت بويىنشا بەدەلدى ماراپات يەلەرى.
رۋشدي مەن ەتۆۋد سىيلىقتارىنىڭ قاتارىندا بۋكەر پرەمياسى دا بار. ەتۆۋد ءتىپتى ونى ەكى رەت جەڭىپ العان.
فوسسەنىڭ اتى دا ۇزدىكتەر قاتارىندا ايتىلعانىمەن، سىنشىلار دەن سياوحۋا دەگەن لاقاپ اتپەن جازاتىن قىتاي جازۋشىسى تسان سيۋە جەڭەدى دەپ بولجادى.
سىنشىلاردىڭ ايتۋىنشا، ونىڭ شىعارمالارىندا الەم مەن قىتايداعى XX عاسىردىڭ تۋربۋلەنتتىگى عاجاپ سيپاتتالعان.