قازاقستاندىق بالۋاندار جاڭا ماۋسىمدا قانداي تۋرنيرلەردە ونەر كورسەتەدى؟
استانا. KAZINFORM - جاڭا ماۋسىم قازاقستاندىق بالۋاندار ءۇشىن ۇلكەن مۇمكىندىكتەر مەن ماڭىزدى سىناقتاردىڭ كەزەڭى بولماق. كەزەكتى وليمپيادالىق ماۋسىم ءبىرقاتار ءىرى تۋرنيردەن باستالادى. سونىمەن قاتار جاس سپورتشىلارعا ءوز الەۋەتىن كورسەتۋگە مۇمكىندىك بەرەدى.
ءداستۇر بويىنشا ماۋسىمداعى العاشقى ءىرى تۋرنيرلەردىڭ ءبىرى بولگاريادا وتەتىن «دان كولوۆ - نيكولا پەتروۆ» حالىقارالىق جارىسى بولماق. ول 23-26-قاڭتار ارالىعىندا ۆارنادا وتەدى. مەدالدار ەركىن كۇرەس، گرەك-ريم كۇرەسى جانە ايەلدەر كۇرەسى بويىنشا ساراپقا سالىنادى.
كەيىننەن رەيتينگتىك ماڭىزعا يە Zagreb Open تۋرنيرى وتەدى. ونى حورۆاتيانىڭ زاگرەب قالاسى قابىلدايدى. جارىس 5-9-اقپان ارالىعىندا وتەدى. ايتا كەتەيىك، اقپان ايى حالىقارالىق كۇنتىزبە بويىنشا قاربالاسقا تولى بولادى. اي بويى ءبىرقاتار حالىقارالىق جارىس ۇيىمداستىرىلادى، سوندىقتان قازاقستان قۇراماسىنىڭ باپكەرلەر شتابىنا ۇلتتىق قۇرامدى سىناقتان وتكىزۋ ءۇشىن مۇمكىندىك جەتكىلىكتى.
ناۋرىز ايىندا قازاقستان قۇراماسى ەرەسەكتەر اراسىنداعى ازيا چەمپيوناتىندا ونەر كورسەتەدى. بيىل قۇرلىقتىق بىرىنشىلىك يوردانيانىڭ اممان قالاسىندا 25-30-ناۋرىز ارالىعىندا وتەدى.
UWW كۇنتىزبەسىنە جاقسىلىق ۇشكەمپىروۆتىڭ قۇرمەتىنە ارنالعان تۋرنير دە ەنگىزىلدى. ول 9-13-ءساۋىر ارالىعىندا استانادا وتەدى. بۇل جارىسقا تەك قازاقستاندىق گرەك-ريم كۇرەسىنىڭ بالۋاندارى ەمەس، سونىمەن قاتار باسقا ەلدەردىڭ سپورتشىلارى دا قاتىسادى.
ودان كەيىن رەيتينگتىك جانە حالىقارالىق تۋرنيرلەردىڭ كەزەكتى سەرياسى باستالادى. كەيبىر جارىستاردا قازاقستاندىق سپورتشىلاردىڭ دا مەدال ءۇشىن تالاسۋعا مۇمكىندىكتەرى جەتكىلىكتى. ماۋسىم ايىندا قۇراما يتاليادا جىل سايىن ءداستۇرلى تۇردە وتەتىن «ماتتەو پەلليكونە» مەموريالىنا قاتىسۋى ىقتيمال.
سونداي-اق، ماۋسىم ايىندا 17-جانە 23-جاسقا دەيىنگى سپورتشىلار اراسىندا ازيا چەمپيوناتى وتەدى. بۇل جارىس 14-22-ماۋسىم ارالىعىندا ۆەتنامنىڭ ۆۋنگتاۋ قالاسىندا ۇيىمداستىرىلادى. ال 5-13-شىلدە ارالىعىندا U15 جانە U20 جاس ساناتىنداعى قۇرلىقتىق بىرىنشىلىك قىرعىزستاننىڭ بىشكەك قالاسىندا وتەدى.
شىلدە ايىنىڭ باستى جارىسى - 17 جاسقا دەيىنگى بالۋاندار اراسىنداعى الەم چەمپيوناتى. ول 28-شىلدە مەن 3-تامىز ارالىعىندا گرەكيانىڭ افينا قالاسىندا وتەدى. تامىز ايىندا جاستار اراسىنداعى الەم چەمپيوناتى ۇيىمداستىرىلادى. U20 جاس ساناتىنداعى الەمدىك بىرىنشىلىك 18-24-تامىز ارالىعىندا بولگاريانىڭ سوفيا قالاسىندا وتكىزىلەدى.
UWW جارىس كۇنتىزبەسىنە سايكەس، قىركۇيەك ايىندا باستى نازار ەكى جارىسقا اۋدارىلادى. 8-قىركۇيەكتە باحرەيندە وتەتىن جاس وسپىرىمدەر اراسىنداعى ازيا ويىندارى اياسىنداعى كۇرەس تۋرنيرى باستالادى. ال 13-21-قىركۇيەك ارالىعىندا حورۆاتيانىڭ زاگرەب قالاسىندا ەرەسەكتەر اراسىنداعى الەم چەمپيوناتى وتكىزىلۋى جوسپارلانعان.
قازان ايىندا قازاقستان قۇراماسى تاعى ءبىر الەم چەمپيوناتىنا قاتىسادى. بۇل جولى سەربيانىڭ نوۆي-ساد قالاسىندا جاستار اراسىنداعى الەم بىرىنشىلىگى وتەدى. جارىس 20-26-قازان ارالىعىنا جوسپارلانعان.
ۇزاق ماۋسىم حالىقارالىق جارىستارمەن اياقتالادى. سونىڭ ىشىندە ءداستۇرلى تۇردە تارازدا وتەتىن دىنمۇحامەد قونايەۆتى ەسكە الۋعا ارنالعان تۋرنير بار. ول 3-5-قاراشا ارالىعىندا ۇيىمداستىرىلادى.
ارينە، قۇرامامىز ءۇشىن باستى باسىمدىق - الەم جانە ازيا چەمپيوناتتارى. بالۋاندارىمىزدىڭ دايىندىعىنا ارنالعان باعدارلاما كۇشەيتىلگەن جاتتىعۋ جيىندارىن، سونداي-اق حالىقارالىق جانە رەيتينگتىك تۋرنيرلەردى قامتيدى.
