قازاقستاندىق ب ا ق قىزمەتكەرلەرى پرەزيدەنت اتىنان پاتەر الدى

Фото: Солтан Жексенбеков / Kazinform
Фото: Солтан Жексенбеков / Kazinform

استانا. KAZINFORM - بۇقارالىق اقپارات قۇرالدارى قىزمەتكەرلەرى كۇنىندە مەملەكەت باسشىسىنىڭ تاپسىرماسىمەن 16 وتاندىق ب ا ق قىزمەتكەرلەرىنە سالتاناتتى تۇردە پاتەر سەرتيفيكاتتارى تابىس ەتىلدى.

ق ر پرەزيدەنتىنىڭ كەڭەسشىسى جانە باسپا ءسوز حاتشىسى بەرىك ءۋالي ارىپتەستەرىن مەرەكەمەن قۇتتىقتاپ، وتاندىق جۋرناليستيكانىڭ دامۋىنا ەلەۋلى ۇلەس قوسقانىن اتاپ ءوتتى.

«بىلتىر مەملەكەت باسشىسى «دارا» قورى ارقىلى جۋرناليستەرگە 65 پاتەر تارتۋ ەتكەن بولاتىن. بۇل پاتەرلەردى مەملەكەتتىك باعدارلاما ارقىلى ەمەس، پرەزيدەنتتىڭ تىكەلەي تارتۋى دەپ قابىلداۋىمىز كەرەك. بۇعان دەيىن جۋرناليستەر اراسىندا نە مەملەكەتتىك قىزمەتكەرلەر ساناتىنا، نە بيۋجەتتىك قىزمەتكەرلەر ساناتىنا ىلىگە المايتىنى جانە مەملەكەتتىك باعدارلامالاردىڭ يگىلىگىن كورە المايتىنى ءجيى ايتىلاتىن. بۇل سوزدەر ايتىلعان كۇيى قالاتىن، ەندى بىلتىردان باستاپ مەملەكەت باسشىسى جۋرناليستەرگە پاتەر كىلتىن تابىستاۋدى داستۇرگە اينالدىرىپ جاتىر. ەڭ باستىسى پاتەر كىلتتەرى مەملەكەتىمىزدىڭ دامۋىنا، مەملەكەت باسشىسى جۇرگىزىپ وتىرعان رەفورمالاردى حالىققا جەتكىزۋگە اتسالىسقان ارىپتەستەرىمىزگە بەرىلۋدە. بيىل 67 پاتەر بەرىلدى جانە العاش رەت 3 بولمەلى پاتەرلەر تابىس ەتىلدى»* ، - دەدى بەرىك ءۋالي سالتاناتتى شارادا.

ونىڭ ايتۋىنشا، پاتەر سەرتيفيكاتىن العان جاندار ىشىندە 21 كوپبالالى وتباسى، 5 جالعىزباستى انا جانە ەرەكشە قاجەتتىلىگى بار بالا تاربيەلەپ وتىرعان 11 وتباسى بار.

مادەنيەت جانە اقپارات ءمينيسترى ايدا بالايەۆا جۋرناليستەر مەن ب ا ق قىزمەتكەرلەرىن كاسىبي مەرەكەسىمەن قۇتتىقتادى.

«قۇرمەتتى ارىپتەستەر، ءتول مەرەكەلەرىڭىز قۇتتى بولسىن! پرەزيدەنت كەشەدەن بەرى جۋرناليستيكا سالاسىنىڭ دەڭگەيىن، جالپى مارتەبەسىن كوتەرىپ، سىزدەردىڭ ەڭبەكتەرىڭىزدى ەرەكشە اتاپ ءوتىپ جاتىر. مەملەكەتتىك ناگرادالار، بۇگىنگى تۇرعىن ءۇيدىڭ كىلتىن الۋ سونىڭ ايقىن كورىنىسى. مەن ءۇشىن وسى قۋانىشتى سىزدەرمەن ءبولىسۋ ەكى ەسە باقىت. ەڭبەكتەرىڭىزدى مەملەكەت باعالاي بەرسىن»، - دەدى ايدا بالايەۆا.

پاتەر العان ب ا ق قىزمەتكەرلەرى قاتارىندا پرەزيدەنت تەلەراديوكەشەنىنىڭ قىزمەتكەرلەرى دە بار.

3 بولمەلى پاتەردى Kazinform اگەنتتىگىنىڭ اعىلشىن رەداكسياسىنىڭ شىعارۋشى رەداكتورى جاننا نۇرماعانبەتوۆا الدى. ول اگەنتتىكتە 20 جىلدان استام جۇمىس ىستەيدى جانە 5 بالانىڭ اناسى.

سونداي-اق، جاڭا 2 بولمەلى پاتەر كىلتى Kazinform اگەنتتىگىنىڭ ءتىلشىسى مارلان جيەمبايعا بەرىلدى، ول اگەنتتىكتە 19 جىل جۇمىس ىستەيدى جانە ەڭ ۇزدىك قىزمەتكەرلەرىنىڭ ءبىرى بولىپ سانالادى.

مەملەكەت باسشىسىنىڭ ماسس-مەدياعا قوسقان ەرەكشە ۇلەسى ءۇشىن جۋرناليستەرگە پاتەر تاپسىرۋ باستاماسىن «دارا» پرەزيدەنتتىك باستامالار قورى قولدادى.

«ءبىز، قازاقستاندىقتار - دانا حالىقپىز. ءسوز قۇدىرەتىن جوعارى باعالايمىز. سوندىقتان قالامدارىڭىز مۇقالماسىن، جۇمىستارىڭىز ءاردايىم بيىكتەن كورىنە بەرسىن»، - «دارا» قورىنىڭ باسشىسى اسەل شىلدەبايەۆا.

2022-جىلى قۇرىلعان «دارا» پرەزيدەنتتىك باستامالار قورىنىڭ قىزمەتى كرەاتيۆتى سەكتوردى دامىتۋعا، قازاقستاندىقتاردىڭ شىعارماشىلىق الەۋەتىن ىسكە اسىرۋ ءۇشىن قولايلى جاعدايلاردى قامتاماسىز ەتۋگە جانە جاڭا جۇمىس ورىندارىن قۇرۋعا باعىتتالعان.

سوڭعى جاڭالىقتار