قازاقستاندىق اۋىر اتلەت ازيا ويىندارىندا قولا مەدال ەنشىلەدى
قىتايدىڭ حاڭجوۋ قالاسىندا ءوتىپ جاتقان ازيا ويىندارىندا قازاقستاندىق اۋىر اتلەت الەكساندر ۋۆاروۆ قولا مەدال جەڭىپ الدى، دەپ حابارلايدى قازاقپارات ءتىلشىسى.

قازاقستاندىق اۋىر اتلەت 81 كەلىگە دەيىنگى سالماقتا سىنعا ءتۇستى.
ونىڭ ەكى جاتتىعۋ بويىنشا كورسەتكىشى — 348 كەلى.
اتالعان سالماقتا ءبىرىنشى ورىن سولتۇستىك كورەيادان كەلگەن ري چونسونعا (364 كەلى)، ەكىنشى ورىن وزبەكستاندىق مۇحاممەدكودير توشتەميروۆكە (351 كەلى) بۇيىردى.
تاعى ءبىر قازاقستاندىق ەلامان سەيتقازى ءتورتىنشى (343 كەلى) ورىندا.
ازيا ويىندارىندا اۋىر اتلەتيكا سايىستارى 30- قىركۇيەك پەن 7- قازان كۇندەرى وتكىزىلەدى.
ازيادادا قازاقستان قۇراماسىندا 524 سپورتشى بار. ولار سپورتتىڭ 30 تۇرىنەن سىنعا تۇسەدى.
ونىڭ 27 ءسى - وليمپيادالىق سپورت ءتۇرى سانالادى.
ءدۇبىرلى دودادا توعىز سپورت تۇرىنەن پاريجدە وتەتىن 2024-جىلعى وليمپياداعا قاتىسۋعا ليتسەنزيا الادى.
ولاردىڭ قاتارىندا بوكس، ساداق اتۋ، قازىرگى بەسسايىس، ءجۇزۋ، كوركەم ءجۇزۋ، برەيكينگ، كوگالداعى حوككەي، تەننيس، جەڭىل اتلەتيكا بار.