قازاقستاندىق ايەل جەرلەۋگە الىپ بارا جاتقان تۋىسىنىڭ مايىتىمەن ايدالادا قالىپ قويعان

قازاقستاندىق ايەل تۋىسىنىڭ ءمايىتىن شىمكەنتكە جەرلەۋگە الىپ بارا جاتىپ، جولدا قالىپ قويعان.

بۇل تۋرالى الەۋمەتتىك جەلىدە ونىڭ قۇربىسى جازدى، - دەپ حابارلايدى Massaget.kz ءتىلشىسى.

جەلى قولدانۋشىسىنىڭ سوزىنشە، كولىكتىڭ جانارمايى تاۋسىلۋعا تاياعان.

«SOS!!! دوستار، كومەك كەرەك. قۇربىم كەشە شىمكەنتكە گازەلمەن شىققان ەدى. شىمكەنتتە جەرلەۋ ءۇشىن تۋىسقانىنىڭ دەنەسىن الىپ بارا جاتىر. كولىك جولدان شىعىپ كەتكەن، ەندى ولار شىعا الماي وتىر، جانارمايى تاۋسىلدى، توتەنشە جاعداي مينيسترلىگىنە قوڭىراۋ شالدىق. ولار كەشە «كۇتە تۇرىڭدار» دەدى. ولار كەلىپ قاراپ، كەتىپ قالدى، مۇمكىن بىرەۋدىڭ ت ج م- دە تانىسى بار شىعار، مۇمكىن بىرەۋدىڭ جاقىن تۋىستارى نەمەسە دوستارى بار، بىزگە تراكتور كەرەك، ەڭ باستىسى جانارماي»، - دەپ جازدى Facebook-تە ليازات سيتچانوۆا.

Qumash Telegram-ارناسىندا دا وسى جايتقا قاتىستى اقپارات پايدا بولدى.

«ەۆگەنيا قايتىس بولعان قايىن ءسىڭلىسىن قونايەۆتان شىمكەنتكە جەرلەۋ ءۇشىن الىپ بارا جاتتى. كەشە ءتۇس كەزىندە جۇرگىزۋشىمەن بىرگە شىقتى. كەشكە، ساعات 7 دە، ولاردىڭ كولىگى جولدان شىعىپ كەتكەن. ولار وتكەن ءتۇندى ايدالادا مينيۆەندە وتكىزدى. بىردە-ءبىر رەت دالاعا شىقپاعان. ويتكەنى ەسىكتەردى قار بىتەپ تاستاعان. پەشتى اۋىق-اۋىق قوسىپ وتىر، ءبىراق گاز باگى بىتۋگە تاياۋ. جالعىز قۋانتار جايت - ينتەرنەت ۇستاپ تۇرعانى، سونىڭ ارقاسىندا جەنيا بىزگە گەودەرەكتەرىن جىبەرە الدى»، - دەلىنگەن ارنا مالىمەتىندە.

Massaget.kz ءتىلشىسى الماتى وبلىسى توتەنشە جاعدايلار دەپارتامەنتىنە حابارلاستى. ۆەدومستۆو وكىلى مۇنداي شاقىرتۋ تۇسپەگەنىن مالىمدەدى.

بۇل جاعدايدى انىقتاۋ ءۇشىن رەداكسيا وزگە دە وڭىرلەردىڭ توتەنشە جاعدايلار دەپارتامەنتىنەن انىقتاۋعا تىرىسىپ جاتىر.