قازاقستاندىق اۆياكومپانيالار گەوساياسي جاعدايعا بايلانىستى ۇشۋ كەستەسىن قايتا قاراۋدا

استانا. KAZINFORM - قازاقستاننىڭ ازاماتتىق اۆياتسيا كوميتەتى يراننىڭ يزرايل اۋماعىنداعى شابۋىلىنا بايلانىستى قازاقستاندىق اۋە رەيستەرى كەستەسىندە وزگەرىستەر بولۋى مۇمكىن ەكەنىن ايتۋدا.

«يران، يراك، يوردانيا، ليۆان، يزرايل، مىسىر جانە سيريانىڭ كۇردەلى ساياسي جاعدايىنا بايلانىستى قازاقستاننىڭ اۆياتسيالىق اكىمشىلىگى قازىرگى احۋالعا تونگەن قاتەر دارەجەسىنە باعالاۋ جۇرگىزدى. ونىڭ قورىتىندىسى بويىنشا قازاقستاندىق اۆياكومپانيالارعا وسى ەلدەردىڭ اۋە كەڭىستىگىن پايدالانۋ ۇسىنىلمايدى. قازىرگى ۋاقىتتا قازاقستاندىق اۆياكومپانيالار جوعارىدا اتالعان ەلدەردىڭ اۋە كەڭىستىگىن اينالىپ ءوتۋ ماقساتىندا رەيستەر كەستەسىن قايتا قاراۋدا. كومپانيالار جاعدايدى مۇقيات قاداعالاپ وتىر جانە قاجەت بولعان جاعدايدا ءوز كەستەلەرىنە وزگەرىستەر ەنگىزەدى»، - دەپ حابارلادى كوميتەت.

اتاپ ايتقاندا، Air Astana اۋەكومپانياسىنىڭ استانا-دۋباي باعىتى بويىنشا ك س-205 جانە الماتى-دۋباي باعىتى بويىنشا ك س-897 رەيستەرى بۇگىن استانا ۋاقىتى بويىنشا ساعات 15.00 دە ۇشادى.

Qatar Airways اۋەكومپانياسىنىڭ 13 جانە 14-ساۋىردە ورىندالۋى جوسپارلانعان دوحا-الماتى-دوحا باعىتى بويىنشا QR-389/390 QR-391/392 رەيستەرى بەلگىسىز ۋاقىتقا دەيىن شەگەرىلدى.

«قازىرگى ۋاقىتتا اۆياكومپانيا رەيستەردى ورىنداۋ باعىتىن وزگەرتۋ ماسەلەسىن قاراستىرۋدا. جولاۋشىلارعا قولدانىستاعى زاڭنامادا كوزدەلگەن قىزمەتتەر كورسەتىلەدى. جولاۋشىلار رەيستەر مارتەبەسىن رەسمي سايتتاردا نەمەسە اۆياكومپانيالاردىڭ بايلانىس ورتالىقتارى ارقىلى باقىلاۋى كەرەك. جولاۋشىلاردىڭ قاۋىپسىزدىگىن قامتاماسىز ەتۋ - ازاماتتىق اۆياتسيا سالاسى ءۇشىن ماڭىزدى باسىمدىق»، - دەيدى كوميتەت.