قازاقستاندىق اۋە كومپانيالارىنىڭ يەلىگىندە 99 ۇشاق بار
استانا. KAZINFORM وتاندىق اۋە كومپانيالاردىڭ پاركى 2025-جىلى 25 ۇشاقپەن تولىقتىرىلادى. اتاپ ايتساق، «Air Astana» جانە «SCAT» اۆياكومپانيالارى Airbus جانە Boeing زاۋىتتارىنان سۋ جاڭا ۇشاقتاردى جەتكىزۋدى جوسپارلاپ وتىر.
ق ر كولىك مينيسترلىگى ازاماتتىق اۆياتسيا كوميتەتىنىڭ باسپا ءسوز قىزمەتى اگەنتتىك تىلشىسىنە بەرگەن جاۋابىندا 2025-جىلدىڭ سوڭىنا دەيىن «Air Astana» Airbus ا320/321 ماركالى 15 ۇشاقتى جانە Boeing 787 ماركالى 2 ۇشاقتى ساتىپ الاتىنىن ايتتى. ال «SCAT» Boeing 737 ماركالى 8 ۇشاقتى جەتكىزۋدى كوزدەپ وتىر.
بەلگىلى بولعانداي، بىلتىر 12 جاڭا ۇشاق قاتارعا قوسىلعان. «Air Astana» 8 ۇشاق ساتىپ السا، «SCAT» 4 ۇشاقپەن شەكتەلگەن. ال «Air Astana» 1 ،«SCAT» 4 ۇشاقتى ەسەپتەن شىعارعان.
«قازىر قازاقستاندىق اۆياكومپانيالاردىڭ يەلەگىندە 99 ۇشاق بار. اتاپ ايتساق، «SCAT» - 37، «Air Astana» - 50 ،«Qazaq Air» - 5، «يۋجنوە نەبو» - 5 جانە «جەتىسۋ» اۋە كومپانياسىنا 2 ۇشاق تيەسىلى. كوبىنە Airbus A320-321 (42) جانە Boeing 737 (33) ماركالى ۇشاقتاردىڭ ۇلەسى باسىم»، - دەدى ازاماتتىق اۆياتسيا كوميتەتىنىڭ باسپا ءسوز قىزمەتى.
تەحنيكالىق قىزمەت كورسەتۋ باعدارلاماسىنا سايكەس، ءبىر ۇشاق (Airbus A320 جانە Boeing 737) قالىپتى جاعدايدا شامامەن 120,000-150,000 ۇشۋ ساعاتتارىنا دەيىن قىزمەت كورسەتە الاتىنىن اتاپ وتكەن ءجون.
