قازاقستاندىق اۋە كومپانيالارى جاڭا رەكورد ورناتتى

اۆياتسيا سالاسىندا اۋە كولىگىن پايدالانۋ مادەنيەتى بەلسەندى تۇردە قالىپتاسىپ كەلەدى. اۋە تاسىمالدار حالىق اراسىندا كولىكتىڭ نەعۇرلىم تانىمال تۇرىنە اينالۋدا، جولاۋشىلار تاسىمالىنىڭ %23 عا ۇلعايۋى - مۇنىڭ بىردەن ءبىر دالەلى ، دەپ حابارلايدى كولىك مينيسترلىگىنىڭ باسپا ءسوز قىزمەتى.

بيىل قازاقستاندىق اۆياكومپانيالار رەكوردتىق كورسەتكىشكە قول جەتكىزىپ، تاسىمالدانعان جولاۋشىلار سانى 13 ميلليونعا جەتتى.

قازاقستاندىق اۆياكومپانيالاردىڭ اۋە كەمەلەرىنىڭ پاركى 89 دان 99 بىرلىككە دەيىن، ال كرەسلو-ورىنداردىڭ سىيىمدىلىعى 12 دەن 15 مىڭعا دەيىن ۇلعايتىلدى. قابىلدانعان شارالار اۋە تاسىمالداردىڭ قولجەتىمدىلىگىن جاقسارتۋعا جانە رەيستەردىڭ جۇيەلىلىگىن ارتتىرۋعا مۇمكىندىك بەرەدى.

جەكە ينۆەستيسيالار ەسەبىنەن شىمكەنت، قىزىلوردا جانە الماتى قالالارىندا 3 جاڭا جولاۋشىلار تەرمينالىنىڭ قۇرىلىسى جۇرگىزىلۋدە. اتالعان نىساندار كەلەسى جىلدىڭ ناۋرىز، مامىر جانە ماۋسىم ايلارىندا اياقتالادى دەپ جوسپارلانىپ وتىر.

بارلىق ءوڭىردى قولجەتىمدى اۆياتاسىمالدارمەن قامتۋ ماقساتىندا 23 ىشكى الەۋمەتتىك ماڭىزى بار جانە تۋريستىك باعىت سۋبسيديالاندى.

جىل سوڭىنا دەيىن قازاقستاندىق اۋەجايلار 25 ميلليوننان استام جولاۋشىعا قىزمەت كورسەتەدى، بۇل 2022 -جىلمەن سالىستىرعاندا %22 عا ارتىق.

ىشكى تاسىمالداۋ كولەمى تولىعىمەن قالپىنا كەلتىرىلدى جانە اپتاسىنا 50 باعىت بويىنشا 640 رەيستى قۇرايدى.

28 ەلمەن حالىقارالىق اۋە قاتىناسى جولعا قويىلعان. بيىل 23 باعىت بويىنشا 13 ەلگە جاڭا رەيستەر جاڭارتىلىپ، اشىلدى.