قازاقستاندىق 16 جاستاعى ءانشى ا ق ش-تاعى حالىقارالىق ۆوكاليستەر بايقاۋىندا جەڭىمپاز اتاندى
الماتى. KAZINFORM - قازاقستاندىق 16 جاستاعى ورىنداۋشى ادەلينا مۇحامەتجانوۆا امەريكالىق تىڭدارمانداردىڭ جۇرەگىن جاۋلاپ الدى.
جاقىندا ول لاتيف حاميديدىڭ «بۇلبۇل» شىعارماسىمەن ا ق ش-تا وتكەن حالىقارالىق ۆوكالدىق بايقاۋدا جەڭىمپاز اتاندى.
ءانشىنىڭ PR مەنەدجەرى تاتيانا سينەنكونىڭ ايتۋىنشا، 16 جاستاعى ادەلينا مۇحامەتجانوۆا ا ق ش- تاعى ميننەسوتا شتاتىنداعى مەكتەپكە 2022-جىلى قابىلدانعاننان كەيىن، بۇكىل امەريكاداعى 9 ۆوكالدىق كونكۋرسقا قاتىسىپ، كوبىندە جۇلدەلى ورىندارعا يە بولىپ كەلەدى.
وتكەن دەمالىس كۇندەرى اقتىق سىنعا شىققانداردى انىقتاعان «Radda Rise International Piano and Vocal Competition» حالىقارالىق بايقاۋى دا وسى تابىستاردىڭ قاتارىنان تابىلىپ، بۇل بايقاۋدا دا ادەلينا قازىلار القاسىنىڭ ءبىراۋىزدى شەشىمىمەن لاتيف حاميديدىڭ «بۇلبۇل» كومپوزيتسياسىمەن ءبىرىنشى ورىنعا يە بولدى.
«ادەلينا - ۆيرتۋوزدى ورىنداۋشى جانە مەن ونىڭ تەحنيكالىق جاعىنان وتە كۇردەلى كومپوزيتسيانى تاڭداپ، ءارقايسىمىزعا ەستەن كەتپەستەي اسەر سىيلادى دەگەنىمە بارشانىڭ كەلىسەتىنە سەنەمىن. مەندە بۇل ءاننىڭ نە تۋرالى ەكەندىگى جايلى مۇلدە تۇسىنىك جوق. ءبىراق، ول مەنى ءاربىر نوتانى سەزىنۋگە ماجبۇرلەدى. «بۇلبۇل» تاعى دا جانە تاعى دا ورىندالۋى ءتيىس»، - دەدى قازىلار القاسىنىڭ مۇشەسى، بەدەلدى Saint Thomas Choir School ۆوكالدىق وقىتۋشىسى، Manhattan School of Music Precollege ۆوكال فاكۋلتەتىنىڭ مۇشەسى دجۋزەپپە سپولەتيني.
ادەلينا باسەكەلەستەرىنىڭ وتە مىقتى بولعانىن جەتكىزدى.
«بايقاۋعا مەن 3 كومپوزيتسيا ۇسىندىم، جانە قازاقتىڭ اكادەميالىق كلاسسيگىنە ءىلتيپات ءبىلدىرىلىپ، وسىنداي جىلى لەبىزدەر ەستىگەنىمە وتە قۋانىشتىمىن. وعان قوسا مەنىڭ باسەكەلەستەرىم وتە مىقتى بولدى: 3-ورىن امەريكاندىق ونەر جانە مۋزىكا سالاسىنداعى ەڭ ءىرى جوعارى وقۋ ورىندارىنىڭ ءبىرى The Julliard School ستۋدەنتىنە بەرىلگەنىن بىلەمىن. ارينە، وسىنداي جەڭىس بۇدان دا كوپ ەڭبەكتەنۋگە قۇلشىندىرادى»، - دەيدى ادەلينا.
ايتا كەتەيىك، ادەلينا مۇحامەتجانوۆا 7 جىلدان استام ۋاقىتتان بەرى اكادەميالىق ۆوكال بويىنشا ءبىلىم الىپ كەلەدى، ونىڭ ۇستازى - قۇرمانعازى اتىنداعى قازاق ۇلتتىق كونسەرۆاتورياسىنىڭ «ۆوكال ونەرى» كافەدراسىنىڭ دوتسەنتى گۇلنار نۇرعاليەۆا.
