قازاقستانداعى تاعى ءبىر كومپانيا مۇناي ءوندىرۋ كولەمىن ازايتتى
كاسپي تەڭىزىنىڭ قازاقستاندىق سەكتورىنداعى «قاشاعان» كەن ورنىن يگەرىپ جاتقان NCOC كومپانياسى مۇناي ءوندىرۋدى 38 پايىزعا تومەندەتتى.
بۇعان كاسپي قۇبىر جەلىسى كونسورتسيۋمىنىڭ مۇناي جونەلتۋدى توقتاتا تۇرۋعا بايلانىستى شەشىمى اسەر ەتۋى مۇمكىن، دەپ حابارلايدى Kazinform.
ENERGY MONITOR تەلەگرام كانالىنىڭ مالىمەتىنە قاراعاندا، كەشە NCOC كومپانياسى مۇناي ءوندىرۋدى 54 مىڭ توننادان 33 مىڭ تونناعا دەيىن تومەندەتكەن.
«تاعى ءبىر ءىرى قازاقستاندىق كومپانيا كاسپي قۇبىر كونسورتسيۋمى (ك ق ك) اۋا- رايىنىڭ ناشارلاۋىنا بايلانىستى نوۆوروسسييسك پورتىنا مۇناي جونەلتۋدى توقتاتا تۇرۋىنا بايلانىستى مۇناي ءوندىرۋدى شەكتەدى. كەشە NCOC كومپانياسى مۇناي ءوندىرۋدى %38 عا، 54 مىڭ توننادان 33 مىڭ تونناعا دەيىن تومەندەتتى. ت ش و كومپانياسى 26-قاراشادا ءوندىرىستى %50 عا، 28-قاراشادا تاعى %10 عا ازايتتى»، - دەپ حابارلادى ENERGY MONITOR.
بۇعان دەيىن ەنەرگەتيكا ءمينيسترىنىڭ كەڭەسشىسى ەلىمىزدىڭ ءىرى كەن ورىندارىندا مۇناي ءوندىرۋ كولەمى 56 پايىزعا قىسقارعانىن ايتقان ەدى.
«قازىرگى ساتتە ەلىمىزدىڭ ءىرى كەن ورىندارىندا مۇناي ءوندىرۋ كولەمى 56 پايىزعا تومەندەدى. ەنەرگەتيكا مينيسترلىگىندە قانداي كەزەڭدە جاعدايدىڭ تۇراقتالاتىنىنا قاتىستى مالىمەت جوق. تاياۋ كەلەشەكتە مۇناي ءوندىرۋ كولەمىنىڭ تومەندەۋى مەن تۇزەتىلۋى اعىمداعى دەڭگەيدە قالادى»، - دەدى ەنەرگەتيكا ءمينيسترىنىڭ كەڭەسشىسى شىڭعىس ءىلياسوۆ.
