قازاقستانداعى مەدرەسەلەر جۇمىسى قالاي رەتتەلەدى

استانا. KAZINFORM - قازاقستان مۇسىلماندارى ءدىني باسقارماسى جانىندا 9 مەدرەسە- كوللەدج جۇمىس ىستەيدى. بۇل تۋرالى ق ر مادەنيەت جانە اقپارات مينيسترلىگى ءدىن ىستەرى كوميتەتى Kazinform اگەنتتىگىنىڭ رەسمي ساۋالىنا بەرگەن جاۋابىندا حابارلادى.

مەدرەسە - تەحنيكالىق جانە كاسىپتىك ءبىلىم بەرۋ ۇيىمى بولىپ سانالادى، كوللەدج مارتەبەسىنە يە جانە ءوز قىزمەتىن تەحنيكالىق جانە كاسىپتىك ءبىلىم بەرۋدىڭ مەملەكەتتىك جالپىعا مىندەتتى ستاندارتتارىنا سايكەس جۇرگىزەدى.

ءدىن ىستەرى كوميتەتى ەلىمىزدە جۇمىس ىستەيتىن مەدرەسە-كوللەدجدەردىڭ ءتىزىمىن ۇسىندى:

• استانا مەدرەسە-كوللەدجى؛

• «ءابۋ حانيفا» مەدرەسە-كوللەدجى (الماتى ق.)؛

• شىمكەنت مەدرەسە-كوللەدجى؛

• ورال مەدرەسە-كوللەدجى (ورال ق.)؛

• ھيباتۋللا تارازي مەدرەسە-كوللەدجى (تاراز ق.)؛

• ءابۋ باكىر سىدىق مەدرەسە-كوللەدجى (پاۆلودار ق.)؛

• ءۇشقوڭىر مەدرەسە-كوللەدجى (الماتى وبلىسى، جامبىل اۋدانى، قارعالى اۋىلى)؛

• سارىاعاش مەدرەسە-كوللەدجى (تۇركىستان وبلىسى، سارىاعاش اۋدانى، ىنتىماق اۋىلى)؛

• اقتوبە مەدرەسە- كوللەدجى (اقتوبە وبلىسى، العا اۋدانى، بەستاماق اۋىلى).

اتالعان وقۋ ورىندارى «4S02210103 - يمام-حاتيب»، «4S02210104 - ۇستاز» يسلامتانۋ باعدارلامالارى بويىنشا ءدىني ءبىلىم بەرۋ سالاسىنداعى مامانداردى دايىندايدى.

كوميتەت مالىمەتىنشە، بۇل مەدرەسە- كوللەدجدەردە 2921 ستۋدەنت ءبىلىم الۋدا، ونىڭ ىشىندە 1759 ەر بالا، 1162 قىز بالا بار. وقۋ ارالاس تۇردە، ياعني ۇلدار مەن قىزدار ءبىر وقۋ ورنىندا قاتار ءبىلىم الادى.

- مەدرەسە-كوللەدجدەردىڭ ءبىلىم بەرۋ باعدارلامالارى جۇمىس بەرۋشىلەردىڭ قاتىسۋىمەن مەملەكەتتىك جالپىعا مىندەتتى ءبىلىم بەرۋ ستاندارتى مەن كاسىبي ستاندارتتار تالاپتارىنا نەگىزدەلىپ ازىرلەنەدى. سونىمەن بىرگە مەدرەسە-كوللەدجدەردەگى ماماندىقتار ق ر ءبىلىم جانە عىلىم ءمينيسترىنىڭ 2018-جىلعى 27-قىركۇيەكتەگى 500-بۇيرىعىمەن بەكىتىلگەن تەحنيكالىق جانە كاسىپتىك ءبىلىم بەرۋ ماماندىقتارى مەن بىلىكتىلىكتەرى جىكتەۋىشىنە ەنگىزىلگەن. اتاپ ايتقاندا، بۇل «ءدىن جانە تەولوگيا» بولىمىنە (يسلامتانۋ، تەولوگيا، حاديستانۋ) جاتادى. بۇل مەدرەسە-كوللەدجدەردىڭ وقىتۋ باعدارلامالارىنىڭ زاماناۋي ستاندارتتار مەن ەڭبەك نارىعى تالاپتارىنا ساي بولۋىن قامتاماسىز ەتەدى، - دەپ جازدى ۆەدومستۆو.

كوميتەتتىڭ مالىمەتىنشە، مەدرەسە-كوللەدجدەردە قولدانىلاتىن ءدىني ادەبيەتتەر مەن وقۋ ماتەريالدارىن ق ر وقۋ-اعارتۋ مينيسترلىگىنە قاراستى «Talap» ك ە ا ق بەكىتەدى جانە قاداعالايدى. بۇل ۇيىم تەحنيكالىق جانە كاسىپتىك ءبىلىم بەرۋ ۇيىمدارىنىڭ، سونىڭ ىشىندە مەدرەسە-كوللەدجدەردەگى ءدىني ءبىلىم بەرۋ مازمۇنىنىڭ وقۋ باعدارلامالارى مەن وقۋلىقتارىن ساراپتاۋ جانە بەكىتۋ جۇمىستارىن جۇرگىزەتىن نەگىزگى ورگان سانالادى.

ەسكە سالا كەتەيىك، بۇعان دەيىن سارىاعاشتاعى مەدرەسە-كوللەدجگە مەملەكەت ەسەبىنەن 1 ميلليارد 600 ميلليون تەڭگەدەن استام قارجى بولىنگەنىن جازعان ەدىك.