قازاقستانداعى ەڭ لاس قالالار اتالدى

استانا. KAZINFORM - ەكولوگيا جانە تابيعي رەسۋرستار مينيسترلىگى مەملەكەتتىك ەكولوگيالىق باقىلاۋ باسقارماسىنىڭ باس ساراپشىسى الماس ىسقاقوۆ ەلىمىزدەگى اۋا تازالىعىن مونيتورينگىلەۋ جۇمىستارى تۋرالى ايتىپ بەردى.

«بۇگىندە 45 ونەركاسىپتىك قالا مەن مەگاپوليستىڭ ىشىندە ەڭ لاس قالالار قاتارىنا استانا، الماتى، قاراعاندى، تەمىرتاۋ، اتىراۋ، اقتوبە، وسكەمەن جانە شىمكەنت جاتادى. ەلىمىزدەگى اتموسفەرالىق اۋانىڭ جاي- كۇيىن باقىلاۋ رەسپۋبليكانىڭ 69 ەلدى مەكەنىندە 170 باقىلاۋ بەكەتىندە، ونىڭ ىشىندە 47 قولمەن سىناما الۋ جانە 130 اۆتوماتتى باقىلاۋ بەكەتىندە جۇرگىزىلەدى»، - دەدى الماس ىسقاقوۆ مينيسترلىكتە وتكەن ونلاين بريفينگىدە.

ونىڭ ايتۋىنشا، ەگەر قاراعاندى، تەمىرتاۋ، اتىراۋ جانە تاعى باسقا قالالاردا اۋانىڭ لاستانۋ سەبەپتەرى ونەركاسىپپەن بايلانىستى بولسا، ال استانا مەن الماتىدا اۆتوكولىكتەن شىعاتىن شىعارىندىلاردىڭ كوپتىگىنەن اۋا لاستانىپ وتىر.

«2023 -جىلعى ۇلتتىق ستاتيستيكا بيۋروسىنىڭ دەرەكتەرى بويىنشا رەسپۋبليكا بويىنشا اۆتوكولىك قۇرالدارىنىڭ سانى 4449,3 مىڭ بىرلىك. ونىڭ ىشىندە كولىكتەردىڭ %50 (2224,6 مىڭ بىرلىك) جاسالعانىنا 20 جىلدان اسىپ كەتكەن. وتكەن جىلى جەلتوقسان ايىندا الماتىدا 600 مىڭعا جۋىق اۆتوموبيل تىركەلگەن، كۇن سايىن قالاعا 700 مىڭنان استام كولىك كىرەدى. استانا قالاسى اكىمدىگىنىڭ اقپاراتىنا سايكەس، ەلوردادا 320 مىڭ اۆتوكولىك (287,5 مىڭ جەڭىل اۆتوكولىك، 23,5 مىڭ جۇك كولىگى، 6,8 مىڭ اۆتوبۋس) تىركەلگەن، ونىڭ %50 پايدالانعانىنا 10 جىلدان اسقان. جالپى، قالا بويىنشا ەۋرو 4 جانە 5 ستاندارتىنا سايكەس كەلەتىن اۆتوكولىكتىڭ سانى 90 مىڭنان اسپايدى (تىركەلگەن اۆتوكولىك قۇرالدارىنىڭ جالپى سانىنىڭ %28)»، - دەيدى سپيكەر.