قازاقستانداعى ەڭ باي زەينەتكەر اي سايىن قانشا الادى

استانا. KAZINFORM - ءبىرىڭعاي جيناقتاۋشى زەينەتاقى قورى (ب ج ز ق) قازاقستانداعى ەڭ باي زەينەتكەر اي سايىن قانشا الاتىنى جونىندە اقپارات تاراتتى.

زەينەت جاسىنا تولۋىنا بايلانىستى ب ج ز ق- دان بەرىلەتىن ورتاشا ايلىق تولەم - 33865 تەڭگە، ال اي سايىنعى تولەمنىڭ ەڭ جوعارعى سوماسى - 945752 تەڭگە بولدى، - دەپ حابارلايدى ب ج ز ق سايتى.

رەسمي مالىمەتكە سۇيەنسەك، 2024-جىلدىڭ 1-قاراشاسىنداعى جاعداي بويىنشا وتانداستارىمىزدىڭ زەينەتاقى اكتيۆتەرى 21,6 تريلليون تەڭگە بولعان. 10 اي ىشىندە 3,7 تريلليون تەڭگەدەن اسا مولشەرگە (%20,8 جەتتى) ءوستى. زەينەتاقى اكتيۆتەرىنىڭ جىلدىق ءوسىمى - شامامەن 4,4 تريلليون تەڭگە (نەمەسە %25,3).

مىندەتتى زەينەتاقى جارنالارى (م ز ج) ەسەبىنەن قالىپتاسقان زەينەتاقى جيناقتارىنىڭ كولەمى 2024-جىلدىڭ 1-قاراشاسىندا 20,7 تريلليون تەڭگەدەن استى (ءبىر جىلداعى ءوسىم - %24,5، جىل باسىنان بەرى - %19,9). مىندەتتى كاسىپتىك زەينەتاقى جارنالارى (م ك ز ج) ەسەبىنەن زەينەتاقى جيناقتارى - شامامەن 633,8 ميلليارد تەڭگە، ءبىر جىلداعى ءوسىم - %15,3 اعىمداعى جىلدىڭ باسىنان بەرگى ءوسىم - %11,5. ەڭ ۇلكەن ءوسىمدى (ءبىر جىلعا - %47,3، جىل باسىنان بەرى - %39,2) ەرىكتى زەينەتاقى جارنالارى (ە ز ج) بويىنشا جيناقتار كورسەتتى، ونىڭ كولەمى - 7,3 ميلليارد تەڭگەدەن اسادى.

2024-جىلعى 1-قاڭتاردان باستاپ سالىمشىلاردىڭ (الۋشىلاردىڭ) زەينەتاقى شوتتارىنا قوسىمشا قاراجات - جۇمىس بەرۋشىنىڭ مىندەتتى زەينەتاقى جارنالارى (ج م ز ج) تۇسۋدە. 2024-جىلدىڭ 10 ايىندا ج م ز ج ەسەبىنەن زەينەتاقى جيناقتارىنىڭ سوماسى 194,9 ميلليارد تەڭگەدەن اسقان.