قازاقستانداعى گازدىڭ 85 پايىزدان استامى باتىستاعى ءۇش كەن ورنىنان وندىرىلەدى

اتىراۋ. KAZINFORM - قازاقستانداعى گازدىڭ 85 پايىزدان استامى باتىستاعى ءۇش كەن ورنىنان وندىرىلەدى. كەن ورنىنىڭ ەكەۋى اتىراۋ، بىرەۋى باتىس قازاقستان وبلىسىندا ورنالاسقان.

ەنەرگەتيكا مينيسترلىگىنىڭ مالىمەتىنشە، ق ر «گاز جانە گازبەن جابدىقتاۋ تۋرالى» زاڭىنا سايكەس «QazaqGaz» ۇ ك ا ق- مەن بىرگە 2030-جىلعا دەيىن گازدىڭ بولجامدى بالانسىن قالىپتاستىرىلعان.

«قازاقستاندا گاز ءوندىرۋدىڭ 85 پايىزدان استامىن تەڭىز (27 پايىز)، قاراشىعاناق (38 پايىز) جانە قاشاعان (20 پايىز) جوبالارى قامتاماسىز ەتەدى. 2023-جىلى قازاقستان رەسپۋبليكاسىنىڭ گاز ءوندىرىسى 59,063 ميلليارد تەكشە مەتردى قۇرادى. ونىڭ ىشىندە تەڭىز كەن ورنىنان - 16,009 ميلليارد تەكشە مەتر، قاراشىعاناقتان 22,385 ميلليارد تەكشە مەتر، قاشاعاننان 11,856 ميلليارد تەكشە مەتر، باسقا كەن ورىندارىنان 8,813 ميلليارد تەكشە مەتر گاز ءوندىرىدى»، - دەپ حابارلادى مينيسترلىكتىڭ باسپا ءسوز قىزمەتى.

مينيسترلىكتىڭ مالىمەتىنە قاراعاندا، گاز سالاسىنىڭ دامۋ قارقىنى سوڭعى جىلدارى ەلىمىزدە گاز ءوندىرۋ تۇراقتى ءوسىپ كەلە جاتقانىمەن راستالعان. بيىل گازدىڭ بولجامدى بالانسىنا سايكەس گاز ءوندىرۋ 60,456 ميلليارد تەكشە مەترگە دەيىن وسەدى جوسپارلانىپ وتىر.

«بيىلعا ارنالعان تاۋارلىق گاز ءوندىرۋ جوسپارى - 28,054 ميلليارد تەكشە مەتر. گازدىڭ بولجامدى بالانسىنا سايكەس اعىمداعى ىشكى تۇتىنۋ 20,9 ميلليارد تەكشە مەتردى قۇرايدى»، - دەلىنگەن مينيسترلىكتىڭ مالىمەتىندە.

ەسكە سالا كەتەلىك، بۇعان دەيىن قازاقستان قاي ەلدەرگە مۇناي-گاز حيميا ونىمدەرىن ەكسپورتتايتىنى حابارلانعان ەدى.