قازاقستانداعى اۋماقتىق قورعانىستىڭ قاعيداتتارى ايقىندالدى - ءماجىلىس
استانا. KAZINFORM - بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ اۋماقتىق قورعانىسى تۋرالى» زاڭى مەن ىلەسپە قۇجات ءبىرىنشى وقىلىمدا ماقۇلداندى.
زاڭ جوباسى اياسىندا قازاقستان رەسپۋبليكاسى اۋماقتىق قورعانىسىنىڭ قۇقىقتىق نەگىزدەرى، ماقساتتارى، مىندەتتەرى مەن قاعيداتتارى ايقىندالادى، قازاقستان رەسپۋبليكاسى مەملەكەتتىك ورگاندارىنىڭ، ۇيىمدارى مەن ازاماتتارىنىڭ وكىلەتتىكتەرى، سونداي-اق ولاردىڭ جاۋاپكەرشىلىگى بەكىتىلەدى.
زاڭ جوباسىنىڭ ماقساتى - قازاقستان رەسپۋبليكاسىنىڭ قورعانىس قابىلەتىن ارتتىرۋ، حالىقتىڭ، اۋماقتىق قورعانىس وبەكتىلەرىنىڭ قاۋىپسىزدىگىن قامتاماسىز ەتۋ جانە قازاقستان رەسپۋبليكاسىنىڭ اۋماعىن جۇمىلدىرۋ، سوعىس جاعدايى كەزەڭىندە ءارى سوعىس ۋاقىتىندا قورعاۋ.
ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ مالىمەتىنشە، بۇل قۇجاتتا قازاقستان رەسپۋبليكاسىنىڭ قورعانىس جۇيەسى ءۇشىن «ەرىكتى ادام» دەگەن جانە «ءوزىن-ءوزى قورعاۋ قۇرىلىمى» دەگەن جاڭا ۇعىمدار ەنگىزىلەدى. وسىلايشا، قازاقستان رەسپۋبليكاسى ازاماتتارىنىڭ جۇمىلدىرۋ، سوعىس جاعدايى كەزەڭىندە جانە سوعىس ۋاقىتىندا ءوزىن-ءوزى قورعاۋ قۇرالىمدارىنا ەرىكتى بولىپ كىرۋ مۇمكىندىگى كوزدەلەدى.
«زاڭ جوباسىندا قازاقستان رەسپۋبليكاسى اۋماقتىق قورعانىس كۇشتەرىنىڭ جالپى قۇرامى ايقىندالادى، وعان قۇقىق قورعاۋ ورگاندارىنىڭ كۇشتەرى مەن قۇرالدارى، قارۋلى كۇشتەر، باسقا دا اسكەرلەر مەن اسكەري قۇرالىمدار بولگەن كۇشتەر مەن قۇرالدار، اۋماقتىق اسكەرلەر، ارناۋلى قۇرالىمدار مەن ءوزىن- ءوزى قورعاۋ قۇرالىمدارى كىرەتىن بولادى. قازاقستان رەسپۋبليكاسى اۋماقتىق قورعانىس كۇشتەرىنىڭ اۋماقتىق قورعانىس مىندەتتەرىن ورىنداۋعا جاۋىنگەرلىك ازىرلىگىن قامتاماسىز ەتۋ جانە اۋماقتىق قورعانىس سالاسىنداعى زاڭنامانى بۇزۋعا جول بەرمەۋ ماقساتىندا مەملەكەتتىك باقىلاۋدى جۇرگىزۋ ءتارتىبى بەلگىلەنەدى»، - دەلىنگەن كوميتەت مالىمەتىندە.
وسىعان دەيىن ءماجىلىستىڭ جالپى وتىرىسىندا «2025-2027-جىلدارعا ارنالعان رەسپۋبليكالىق بيۋجەت تۋرالى» زاڭ قابىلداندى. ونىڭ تالاپتارىنا سايكەس بيۋجەتتىڭ نەگىزگى ۇلەسى الەۋمەتتىك سالاعا باعىتتالادى.
