قازاقستانداعى العاشقى رەفەرەنس-زەرتحانادا قانداي ساراپتامالار جۇرگىزىلەدى
استانا. KAZINFORM – ق ر پ ءى ب مەدورتالىعىنىڭ سانيتارلىق-ەپيدەميولوگيالىق ساراپتاما ورتالىعى(س س ە و) بيولوگيالىق قاۋىپسىزدىك تۋرالى زاڭدى جۇزەگە اسىرۋ اياسىندا بيولوگيالىق قاۋىپسىزدىك سالاسىندا قازاقستان مەن ورتالىق ازياداعى العاشقى رەفەرەنس-زەرتحانا اتانىپ وتىر.
بۇل مارتەبە ورتالىق زەرتحانالارى ەۋرازيالىق ەكونوميكالىق كوميسسيا القاسىنىڭ 2022-جىلعى 31-مامىرداعى 22-«ەۋرازيالىق ەكونوميكالىق وداققا مۇشە مەملەكەتتەردىڭ رەفەرەنس-زەرتحانا جۇيەلەرىن قۇرۋ تۋرالى» ۇسىنىمدارىنا ساي كەلەتىنىن ايعاقتايدى. س ە س و- نىڭ رەفەرەنس-زەرتحانا رەتىندە اككرەديتتەلۋى حالىقتى سانيتارلىق- ەپيدەميولوگيالىق قىزمەتپەن قامتۋدا ماڭىزدى ءرول اتقاراتىنىن، سونداي-اق جەرگىلىكتى بيزنەس ونىمدەردىڭ قاۋىپسىزدىگىن حالىقارالىق دەڭگەيدە راستاۋ قىزمەتىن جەڭىلدەتەتىنىن اتاپ وتكەن ءجون. س ە س و زەرتحانالارىندا جاسالعان ساراپتامالار ILAK (زەرتحانالاردى اككرەديتتەۋ جونىندەگى حالىقارالىق قاۋىمداستىق) قۇرامىنداعى 112 ەلدە مويىندالادى.
ق ر پ ءى ب مەديتسينالىق ورتالىعى باسشىسىنىڭ ورىنباسارى ليۋدميلا بيۋرابەكوۆا اتاپ وتكەندەي، مۇنداي رەفەرەنس-ورتالىق جۇمىس ساپاسىن سىرتقى باعالاۋ جۇيەسىنىڭ، سونىمەن قاتار دياگنوستيكالىق كۇردەلى ءارى ساراپتامالىق جاعدايلاردا زەرتحانالىق زەرتتەۋ جۇرگىزۋدىڭ ماڭىزدى ەلەمەنتى سانالادى.
«سانيتارلىق-ەپيدەميولوگيالىق ساراپتاما ورتالىعى جوعارى دالدىكتەگى بىرەگەي زەرتحانالىق جابدىقتارمەن جابدىقتالعان، مۇندا جوعارى بىلىكتى ماماندار ەڭبەك ەتەدى. سونىڭ ارقاسىندا كۇردەلى زەرتحانالىق زەرتتەۋلەردى ساپالى ءارى جەدەل جاساۋعا جول اشادى. بۇل ەلىمىزدە بيولوگيالىق قاۋىپسىزدىك جۇيەسىن قۇرۋدا وتە ماڭىزدى»، - دەپ اتاپ ءوتتى ل. بيۋرابەكوۆا.
ايتا كەتۋ كەرەك، تەك مەملەكەتتىك قۇرىلىمدار عانا ەمەس، سونىمەن قاتار جەكە ۇيىمدار دا س ە س و زەرتحانالىق ساراپتاما قىزمەتىن پايدالانا الادى. دەمەك، بيزنەسكە ءونىمدى ەكسپورتقا شىعارۋ ءۇشىن نەمەسە ءوز وبەكتىلەرىندە وندىرىستىك باقىلاۋدى جۇزەگە اسىرۋ ءۇشىن ورتالىقتىڭ زەرتتەۋ ناتيجەلەرى پايدالى بولۋى مۇمكىن.
«ءبىزدىڭ سىناق زەرتحانامىز تاۋەلسىز، تەحنيكالىق قۇزىرەتى مول، سىناق ناتيجەلەرىنىڭ ساپاسى كۇمانسىز. اككرەديتتەلگەن زەرتحانانىڭ ساراپتامالارى حالىقارالىق دەڭگەيدە مويىندالادى. بۇل وندىرۋشىلەردىڭ جانە ەكسپورتتاۋشىلاردىڭ شىعىنىن ازايتادى، ولار زەرتتەۋلەردىڭ كەڭ سپەكترىن ەسكەرە وتىرىپ، بەلگىلى ءبىر ونىمگە تولىققاندى ساراپتاما جاساي الادى، شەتەلدە قايتادان سىناق جۇرگىزىپ قوسىمشا شىعىنعا ۇشىرامايدى»، - دەدى س ە س و باسشىسى ساۋلە ءشارىپوۆا.
ايتالىق، س س ە و زەرتحاناسىندا اۋا، سۋ، توپىراق سياقتى سىرتقى ورتا وبەكتىلەرىنە، سونداي-اق تاماق ونىمدەرىنە، پوليمەرلى ماتەريالدارعا جانە باسقا دا ءونىم تۇرلەرىنە كەشەندى زەرتتەۋ جۇرگىزۋگە بولادى. جالپى، رەفەرەنس-زەرتحانانىڭ جۇمىسى قورشاعان ورتانى ساۋىقتىرۋعا جانە حالىقتىڭ سانيتارلىق- ەپيدەميولوگيالىق سالاۋاتىن قامتاماسىز ەتۋگە باعىتتالعان.
ايتا كەتەيىك، س ە س و-نىڭ 8 زەرتحاناسىندا باكتەريولوگيالىق، پارازيتولوگيالىق، مولەكۋليارلىق-گەنەتيكالىق، سانيتارلىق-حيميالىق، توكسيكولوگيالىق، حروماتوگرافيالىق زەرتتەۋلەر جۇرگىزىلەدى، ديوكسيندەر انىقتالادى جانە فيزيكالىق فاكتورلار (يون جانە ەلەكتروماگنيتتىك ساۋلەلەلەر، شۋ مەن جارىق دەڭگەيى، ميكروكليمات) ۇلتتىق جانە حالىقارالىق ستاندارتتارعا سايكەس ولشەنەدى.
سونداي-اق، ورتالىق ماماندارى قىزمەتى تاماق ونىمدەرى مەن اۋىز سۋدى وندىرۋمەن، ساقتاۋمەن، تاسىمالداۋمەن جانە وتكىزۋمەن، بالالاردى تاربيەلەۋ مەن وقىتۋمەن، حالىققا كوممۋنالدىق جانە تۇرمىستىق قىزمەت كورسەتۋمەن بايلانىستى كاسىپورىندارعا حالىقارالىق ترەنينگتەر مەن سانيتارلىق-گيگيەنالىق وقىتۋ وتكىزەدى.
ماۋسىم ايىنىڭ باسىندا ورتالىق بازاسىندا ەۋروپالىق كوميسسيانىڭ قولداۋىمەن حالىقارالىق ترەنينگ ورتالىعى مەن ۋىتتى-اقپاراتتىق ورتالىق اشىلدى.
وسى جىلدىڭ باسىنان بەرى ق ر پ ءى ب مەديتسينالىق ورتالىعىنىڭ سانيتارلىق-ەپيدەميولوگيالىق ساراپتاما ورتالىعىنىڭ ۇجىمى 775 مىڭنان استام زەرتتەۋ جۇرگىزدى. وتكەن جىلدىڭ سايكەس كەزەڭىمەن سالىستىرعاندا زەرتتەۋلەر سانى ەكى ەسە ءوستى.
