قازاقستانداعى ا ق ش ەلشىسى ارالعا باردى

قىزىلوردا. KAZINFORM - ق ر ەكولوگيا جانە تابيعي رەسۋرستار مينيسترلىگىنىڭ وكىلى ا ق ش توتەنشە جانە وكىلەتتى ەلشىسى دەنيەل روزەنبليۋم جانە USAID حالىقارالىق دامۋ اگەنتتىگى وڭىرلىك ميسسيا ديرەكتورىنىڭ ورىنباسارى مونيك موسولفپەن ارال تەڭىزىنىڭ قۇرعاعان تابانىنا ءىس- ساپارمەن بارىپ قايتتى. بۇل تۋرالى ۆەدومستۆونىڭ باسپا ءسوز قىزمەتى مالىمدەدى.

«الەمدىك قاۋىمداستىق ارال تەڭىزىنىڭ تارتىلۋىن ادامزات تاريحىنداعى ەكولوگيالىق داعدارىستىڭ ءبىرى رەتىندە باعالادى. قۇرعاعان تەڭىزدىڭ زاردابى تەك وڭىرگە نەمەسە ءبىر ەلگە عانا ەمەس، بارشا الەمگە تيۋدە. وسى ءىس ساپاردا ارالدىڭ قازىرگى جاعدايىمەن جانە اتقارىلعان جۇمىستارمەن ارنايى تانىستى»، - دەلىنگەن حابارلامادا.

ايتا كەتەيىك، 2021-2023 -جىلدارى USAID حالىقارالىق دامۋ اگەنتتىگىنىڭ «Oasis» جوباسى شەڭبەرىندە ارال تەڭىزىنىڭ قۇرعاعان ۇلتانىنداعى ەكوجۇيەنى قالپىنا كەلتىرۋ ماقساتىندا 150 گەكتار جەرگە سەكسەۋىل تۇقىمى سەبىلىپ، كوشەتتەر وتىرعىزىلدى، 500 مەتر تەرەڭدىكتە سۋ ۇڭعىماسى قازىلىپ، پايدالانۋعا بەرىلدى.

ەسكە سالساق، مەملەكەت باسشىسى 2021-2025 -جىلدار ارالىعىندا ارال تەڭىزىنىڭ قۇرعاعان ۇلتانىنداعى 1,1 ميلليون گەكتارعا سەكسەۋىل ەكپەلەرىن ەگۋدى تاپسىرعان بولاتىن. بيىل 276,2 مىڭ گەكتار اۋماقتا وسى باعىتتاعى جۇمىستار جوسپارلانعان. قازىر 65 مىڭ گەكتار ۇلتانعا 19,4 ميلليون سەكسەۋىل كوشەتى وتىرعىزىلدى، الداعى جىلى 280 مىڭ گەكتار القاپقا ەگىلەدى.