قازاقستانداعى 15 قىتايلىق كومپانيا سۋ تاسقىنىنان زارداپ شەككەندەرگە 300 ميلليون تەڭگە جىبەردى

استانا. KAZINFORM - قازاقستانداعى قىتاي كاسىپكەرلەرىنىڭ باس قاۋىمداستىعى سۋ تاسقىنى سالدارىن جويۋعا جانە تابيعي اپاتتان كەيىن قالپىنا كەلتىرۋ جۇمىستارىنا كومەكتەسۋ ءۇشىن قاراجات جينادى.

بۇگىنگى تاڭدا قىتايلىق كومپانيالار جالپى سوماسى شامامەن 300 ميلليون تەڭگەگە اقشالاي قاراجات ءبولدى، سونداي-اق ارنايى تەحنيكا، وتىن جانە باسقا دا قاجەتتى رەسۋرستار تۇرىندە گۋمانيتارلىق كومەك كورسەتتى، دەپ حابارلادى Kazakh inves ۇ ق ا ق.

«ماسەلەن، «PetroChina International Kazakhstan» جانە ونىڭ ەنشىلەس كاسىپورىندارى 100 ميلليون تەڭگەدەن استام قاراجات اۋداردى. «JAC» اۆتوكونتسەرنى «الليۋرمەن» بىرلەسىپ 100 ميلليون تەڭگە، ال «GEO- Jade Petroleum» قىتاي مۇناي - گاز كورپوراتسياسىنىڭ قازاقستاندىق فيليالى 70 ميلليون تەڭگە ءبولدى. قىتايلىق «سيان ايتسزيۋ» استىق كومپانياسى «سولتۇستىك قازاقستان اپاتتارىنا كومەك قورىنا» 3 ميلليون تەڭگەدەن استام قارجى ءبولدى. قىتاي ۇلتتىق حيميالىق ينجەنەرلىك كورپوراتسياسى مەن «China Tianchen» كومپانياسى سۋ تاسقىنى سالدارىن جويۋعا بىرلەسىپ قاتىسىپ، 1,7 ميلليون تەڭگە قايىرىمدىلىق جاسادى. قازاقستاندىق «JXC» كومپانياسى 1,8 ميلليون تەڭگە سوماعا موتور مايىن سىيعا تارتتى»، - دەلىنگەن حابارلامادا.

ناتيجەسىندە 15 تەن استام قىتايلىق كومپانيا زارداپ شەككەن حالىققا كومەك كورسەتۋگە قاتىستى. ءوز كەزەگىندە قاۋىمداستىق وكىلدەرى بۇل ۇيىم سۋ تاسقىنى مەن قالپىنا كەلتىرۋ جۇمىستارىنا بەلسەندى قاتىسۋ ءۇشىن قىتايلىق كومپانيالارمەن تىعىز جۇمىس ىستەيتىنىن ايتتى.