قازاقستاندا زاڭ قاشان قازاق تىلىندە جازىلا باستايدى - ساراپشى پىكىرى
استانا. KAZINFORM - زاڭ ءتىلى قاراپايىم حالىققا تۇسىنىكتى مە؟ ازاماتتار زاڭدارمەن جاقسى تانىس پا، ءوز قۇقىعىن زاڭ اياسىندا قورعاي الا ما؟ وسى جانە وزگە دە سۇراقتارعا ق ر زاڭناما جانە قۇقىقتىق اقپارات ينستيتۋتىنىڭ لينگۆيستيكا ورتالىعىنىڭ باسشىسى، زاڭ عىلىمدارىنىڭ كانديداتى، دوتسەنت نۇرزادا پريماشوۆ جاۋاپ بەردى.
«بۇگىن - مەملەكەتتىك رامىزدەر كۇنىنە وراي، قۇقىقتىق ۇستەمدىك ادام قۇقىعىن قامتاماسىز ەتۋدىڭ باستى قاعيداتى رەتىندە دەگەن تاقىرىپتى تالقىلاپ وتىرمىز. ءبىزدىڭ ماقسات - زاڭ ءتىلىن قاراپايىم ادامعا ءتۇسىندىرۋ. ءبىز عىلىمي مەكەمەمىز سوندىقتان بيلىكتىڭ اتىنان سويلەۋگە قۇقىعىمىز جوق، ءوز كەزەگىمىزگە قابىلدانىپ جانە قابىلدانعالى جاتقان زاڭداردى تۇسىنىكتى بولۋى ءۇشىن جۇمىس ىستەپ جاتىرمىز. حالىق تاراپىنان زاڭداردىڭ كەيبىر باپتارىن ءتۇسىندىرۋ بويىنشا وتىنىشتەر ءتۇسىپ جاتادى، ءبىز ولاردىڭ تىكەلەي جۇمىس جاسايمىز»، - دەدى نۇرزادا پريماشوۆ ەلوردادا وتكەن «قۇقىق ۇستەمدىگى - ادام قۇقىقتارىن قامتاماسىز ەتۋدىڭ امبەباپ قاعيداتى رەتىندە» تاقىرىبىندا دوڭگەلەك ۇستەل بارىسىندا.
ونىڭ ايتۋىنشا، اتالعان ينستيتۋتتىڭ لينگۆيستيكا ورتالىعىنا قازاق تىلىندەگى زاڭداردىڭ ماسەلەلەرى بويىنشا 5-6 ءوتىنىش كەلىپ تۇسكەن جانە ولارعا ءتيىستى جاۋاپ بەرىلگەن.
«زاڭدارعا قاتىستى سۇراقتار ءارتۇرلى، زاڭ نەگە قازاق تىلىندە جازىلمايدى؟ جالپى زاڭنىڭ ءتىلى كۇردەلى، ونىڭ ىشكى قۇپيالارى بولادى. حالىققا تۇسىنىكتى ەتىپ جازامىز دەپ قاراپايىم دەڭگەيگە ءتۇسىپ كەتە المايمىز عوي. ونىڭ وزىندىك تالاپتارى بار، زاڭنىڭ تەحنيكاسى دەگەن عىلىم بار. بۇگىنگى ءىس-شارادا قۇقىقتىڭ ۇستەمدىگى ەرەجەلەرىنىڭ حالىقارالىق تالاپتارعا ساي بولۋى ماسەلەلەرى قارالىپ وتىر. الەۋمەتتىك ءومىردىڭ بارلىق تۇسىن رەتتەيتىن قۇقىقتىڭ ۇستەمدىگىن ورناتۋ»، - دەيدى ول.
سونداي-اق، مامان ەلىمىزدە زاڭ جوبالارىن قازاق تىلىندە ازىرلەۋگە قاتىستى ماسەلەنى كوتەرەتىنىن ايتتى.
«بۇل دا قۇقىقتىق ۇستەمدىك ورناتۋدىڭ ءبىر باعىتى. زاڭ قازاق تىلىندە جازىلۋى ءۇشىن ءبىرقاتار تالاپ ورىندالۋى كەرەك. بىزدە زاڭگەرلەر بار، ءبىراق، قازاق تىلىندە ويلاپ، جازاتىن، پروتسەستى قازاق تىلىندە جۇرگىزە الاتىن ماماندار تاپشى، ونى مويىنداۋىمىز كەرەك. زاڭ قازاقشا سويلەۋى ءۇشىن ءتىل ماماندارىن دايارلاۋ قاجەت، ءبىز ۇسىنىستى بەرىپ جاتىرمىز، قولداۋ بار. مىسالى، الماتىدا اباي اتىنداعى قازاق ۇلتتىق ۋنيۆەرسيتەتىندە لينگۆيستيكالىق ساراپتاما دەگەن ماماندىق اشىلدى. زاڭ ءتىلى دەگەن ۇعىم بار، ءبىراق، ونى ءالى كوپشىلىك مويىنداعان جوق. ونىڭ وزىندىك ەرەكشەلىكتەرى، قازاق تىلىنە باعىنبايتىن تۇستارى بار»، - دەدى ن. پريماشوۆ.
ايتا كەتەيىك، بۇگىن استانادا ق ر زاڭناما جانە قۇقىقتىق اقپارات ينستيتۋتى ق ر پرەزيدەنت اكىمشىلىگىنىڭ ىشكى ساياسات ءبولىمىنىڭ ۇيىمداستىرۋىمەن «قۇقىق ۇستەمدىگى - ادام قۇقىقتارىن قامتاماسىز ەتۋدىڭ امبەباپ قاعيداتى رەتىندە» تاقىرىبىندا دوڭگەلەك ۇستەل ءوتتى.
ءىس-شاراعا كونستيتۋتسيالىق سوت جانە جوعارعى سوت، باس پروكۋراتۋرا وكىلدەرى، ق ر ادام قۇقىقتارى جونىندەگى ۋاكىلەتتىك، عىلىمي جانە ازاماتتىق قوعامداستىق وكىلدەرى قاتىستى.
اۆتور
داۋلەت ىزتىلەۋ
