قازاقستاندا پىشاق سالماي، ءمايىتتى كومپيۋتەرلىك سكانەرلەۋ ارقىلى تەكسەرۋ ءادىسى ەنگىزىلمەك
كەلەر جىلدان باستاپ قازاقستاندا ءمايىتتى زەرتتەۋ ءۇشىن ۆيرتۋالدى اۋتوپسيا ەنگىزىلۋى مۇمكىن.
ياعني، قايتىس بولعان ادامنىڭ دەنەسىنە تىلىك جاساماي، كومپيۋتەرلىك سكانەرلەۋ ارقىلى تەكسەرەدى. مۇنى ادىلەت مينيسترلىگىنىڭ سوت ساراپتاما ورتالىعى باسشىسىنىڭ ورىنباسارى نازگۇل يمانبايەۆا ايتتى، دەپ حابارلايدى Kazinform.
«ۆيرتۋالدى اۋتوپسيا - ارنايى اپپاراتتىڭ كومەگىمەن، 3D باعدارلاما ارقىلى مارقۇمنىڭ دەنەسىن سكانەرلەۋ. ياعني، مۇنداي ءادىستى قولدانعان كەزدە ءمايىتتى ءتىلىپ، ونىڭ ىشكى اعزالارىن الىپ زەرتتەۋدى قاجەت ەتپەيدى. ول زورلىق، قاساقانا ولتىرىلگەن بەلگىلەرى بار مارقۇمدارعا قولدانىلمايدى. ول ءوز ولىمىنەن نەمەسە قانداي دا ءبىر دەرتتەن كوز جۇمعاندار ءۇشىن قاجەت. ۆيرتۋالدى اۋتوپسيانى پايدالاناتىن شەت مەملەكەتتەر دە سيرەك. مۇنداي ءادىس ۇلىبريتانيادا قولدانىلادى»، - دەدى نازگۇل يمانبايەۆا Kazinform ءتىلشىسىنىڭ ساۋالىنا جاۋاپ بەرە وتىرىپ.
ونىڭ ايتۋىنشا، قازىر ادىلەت مينيسترلىگى وسىنداي ءادىس ارقىلى ءمايىتتى زەرتتەۋ مۇمكىندىكتەرىن قاراستىرىپ، ماسەلەنى پىسىقتاپ جاتىر.
«بۇل ءبىز ءۇشىن وتە جاقسى بولار ەدى. سوت- مەديتسينالىق ساراپتاما جۇمىسىندا قيىندىقتار تۋىنداپ تۇرادى. اتاپ ايتقاندا ءدىني كوزقاراسىنا بايلانىستى كوبى ءمايىتتى كەسىپ، ونىڭ ىشكى اعزالارىن زەرتتەۋگە قارسىلىق بىلدىرەدى. مۇنداي جاعدايدا ولار ارىز جازىپ، ونىڭ ولىمىنە نە سەبەپ بولۋى مۇمكىن ەكەنىن دالەلدەپ، مارقۇمنىڭ دەنەسىن الىپ كەتۋگە قۇقىلى. ال قايتىس بولعان ادامدا زورلىق- زومبىلىق بەلگىلەرى بولسا، وندا وعان تۋىستارىنىڭ رۇقساتىنسىز سوت- مەديتسينالىق ساراپتاماسى جاسالادى. ۆيرتۋالدى اۋتوپسيانى ەنگىزۋ - بۇل ماسەلەنى شەشۋگە كومەكتەسەدى»، - دەيدى نازگۇل يمانبايەۆا.
ورتالىق باسشىسىنىڭ ورىنباسارى اتاپ وتكەندەي، ۆيرتۋالدى اۋتوپسيا جاسايتىن اپپارات قىمبات تۇرادى. ونى ساتىپ الۋ ءۇشىن قازىر قاراجات كوزدەرى ىزدەستىرىلىپ جاتىر.
«ەگەر بارلىعى ءبىز ويلاعانداي بولىپ جاتسا جانە وسى ءادىستى ەنگىزۋ ءۇشىن قاجەتتى قۇرالداردى تاپساق، وندا ونىمەن كەلەر جىلدان باستاپ جۇمىس ىستەۋگە تىرىسامىز دەگەن ءۇمىت بار»، - دەدى ول.
نازگۇل يمانبايەۆانىڭ دەرەگىنشە، ۆيرتۋالدى اۋتوپسيا اپپاراتتارىن ورنالاستىرۋ ءۇشىن ارنايى كەشەن قاجەت. سونىمەن بىرگە ونىمەن جۇمىس ىستەي الاتىن مامانداردى وقىتۋ قاجەت.
