قازاقستاندا يۋان ۆاليۋتاسىنا سۇرانىس ءوسىپ كەلەدى
استانا. KAZINFORM — يۋان ۆاليۋتاسىنا سۇرانىستىڭ ءوسۋى جانە ونىڭ باعامىنىڭ كوتەرىلۋى جاعدايى قىتايلىق تانىمال ماركەتپلەيستەردەگى باعانى جوعارىلاتۋى مۇمكىن.

Finprom.kz مالىمەتىنە قاراعاندا، 2024-جىلعى قاراشادا قازاقستانداعى ايىرباستاۋ پۋنكتتەرىنىڭ قىتاي يۋانىن ساتۋ سوماسى 124 ميلليون تەڭگەنى قۇرادى. بۇل كورسەتكىش ونىڭ الدىنداعى ايمەن سالىستىرعاندا %19,4 عا، ال 2023-جىلعى قاراشامەن سالىستىرعاندا 2 ەسەگە از.
قىتاي ۆاليۋتاسى بويىنشا «تازا» ساتىلىمنىڭ ەڭ ۇلكەن ايلىق كولەمى 2024-جىلى ماۋسىمدا (276,1 ميلليون تەڭگە)، ال ەڭ ازى شىلدەدە (5,1 ميلليون تەڭگە) بايقالدى.
جالپى، 2024 -جىلدىڭ قاڭتار-قاراشا ايلارىندا قىتاي ءيۋانىنىڭ تازا ساتىلىمىنىڭ كولەمى 1,3 ميلليارد تەڭگەدەن استى، بۇل 2023-جىلدىڭ سايكەس كەزەڭىمەن سالىستىرعاندا %39,6 عا كوپ. ايتا كەتۋ كەرەك، اي سايىنعى اۋىتقۋلارعا قاراماستان، قازاقستاندا يۋان ۆاليۋتاسىنا دەگەن سۇرانىس ءۇشىنشى جىل قاتارىنان ارتىپ كەلەدى.
قازاقستان رەسپۋبليكاسىنىڭ 20 ءوڭىرىنىڭ 17 سىندەگى ايىرباستاۋ پۋنكتتەرىندە قىتاي يۋانىن ساتۋدىڭ ءوسىمى بولدى. ەڭ جوعارى كورسەتكىش الماتى (547,4 ميلليون تەڭگە) مەن استانادا (400,3 ميلليون تەڭگە) بەلگىلەندى. قوماقتى سوما قاراعاندى وبلىسىنا دا (126,9 ميلليون) تىركەلدى.
2024-جىلدىڭ جەلتوقسان ايىنداعى يۋانننىڭ رەسمي باعامى ورتاشا ەسەپپەن 71,38 تەڭگەنى قۇرادى. الدىڭعى ايعا قاراعاندا يۋان باعامى %3,9 عا، ال 2023-جىلعى جەلتوقسانمەن سالىستىرعاندا %11,4 عا ءوستى.
2024-جىلدىڭ ءتورتىنشى توقسانىندا ءيۋانننىڭ ورتاشا باعامى 69,55 تەڭگە بولىپ، ءبىر توقساندا %4,4 عا جوعارىلادى. ەڭ تومەنگى باعام ەكىنشى توقساندا بەلگىلەندى - 1 يۋان ءۇشىن 61,82 تەڭگە.
اتاپ ايتقاندا، 2025-جىلى يۋان باعامىنىڭ ءوسۋى جالعاستى. بۇل رەتتە وسى كورسەتكىش جىل باسىنان 14-قاڭتار ارالىعىندا 71,94 تەڭگەدەن 72,08 تەڭگەگە دەيىن ءوستى. وسى جاعداي قىتايدان كەلەتىن تاۋارلاردىڭ تۇپكىلىكتى قۇنىنا، ياعني بىلتىر ۇلكەن سۇرانىستا بولعان اۆتوموبيلدەرگە، سونداي-اق باعاسى باستاپقىدا يۋانمەن بەلگىلەنەتىن ماركەتپلەيستەردەگى تاۋارلاردىڭ قۇنىنا اسەر ەتۋى مۇمكىن.
وسىعان دەيىن قازاقستان بانكتەرىنىڭ اراسىنداعى يۋان ساۋداسى ءبىر ايدا 133 ەسە ارتقانىن جازعان ەدىك.