قازاقستاندا ۇيالى بايلانىس قىزمەتىنىڭ قۇنى قانشا
استانا. KAZINFORM - بۇگىندە ءومىرىمىزدى ۇيالى تەلەفونسىز ەلەستەتۋ مۇمكىن ەمەس. سمارتفوندى ەڭبەكتەگەن بالادان ەڭكەيگەن قارتقا دەيىن قولدانادى. الايدا، بايلانىس وپەراتورلارىنىڭ قىزمەتىنسىز ولاردىڭ قۇنى كوك تيىن.
سوندىقتان ولاردىڭ قىزمەتىنە تەلەفون ۇستاعان كەز كەلگەن ادام جۇگىنۋگە ءماجبۇر. وسىعان وراي Kazinform ءتىلشىسى ۇيالى بايلانىس قىزمەتىنىڭ قۇنىنا شولۋ جاسادى.
قازاقستاندىقتار ءۇشىن ەڭ ارزان ءارى بارىنشا ءتيىمدى ءتاريفتى انىقتاۋ وتە قيىن. مۇندا تۇتىنۋشىعا قاجەت نارسە ماڭىزدى ءرول اتقارادى: ينتەرنەت گيگابايتتارى نەمەسە تەلەفونمەن سويلەسۋ مينۋتتارى. رەيتينگكە كوپتەگەن قازاقستاندىققا بەلگىلى 5 ۇيالى بايلانىس وپەراتور ىلىكتى. باعانى سارالاۋ بارىسىنداز بەلگىلى ءبىر كومپانيانىڭ ەڭ قىمبات تاريفتەرىن دە ەسكەردىك.
باعاسىنىڭ ارزاندىعى جاعىنان ءبىرىنشى ورىندى Tele2 وپەراتورىنا بەرۋگە بولادى. كومپانيانىڭ ەڭ ارزان ستاندارتتى تاريفى 3590 تەڭگە تۇرادى. بۇل اقشاعا ءسىز 11 گيگابايت ينتەرنەت پەن 100 مينۋتتىق تەلەفون قوڭىراۋىن الا الاسىز. ايتا كەتەرلىگى، ءتاريفتى تاڭداعان كەزدە شارتتارىن وزگەرتۋگە بولادى. ايتالىق، ۇيالى بايلانىس مينۋتتارى ەسەبىنەن ترافيكتى كوبەيتە الاسۆز. ال ەڭ قىمبات تاريف 6590 تەڭگەنى قۇرايدى. اتالعان سوماعا 35 گيگابايت پەن 340 مينۋتتى ۇسىنادى جانە بۇل جاعدايدا دا شارتىن ءوزىڭىز وزگەرتە الاسىز. Tele2-دە مەكتەپ وقۋشىلارىنا ارنالعان 990 تەڭگەلىك ءبىلىم بەرۋ تاريفى بار. وعان 7 گيگابايت ترافيك پەن 50 مينۋتتىق قوڭىراۋ كىرەدى. ءدال وسىنداي جەڭىلدىكتى باعامەن زەينەتكەرلەر جانە مۇمكىندىگى شەكتەۋلى جاندار ۇيالى بايلانىس قىزمەتىن قولدانا الادى.
قولجەتىمدىلىگى جاعىنان ەكىنشى ورىندا Activ كەلەدى. مۇنداعى ەڭ ارزان تاريف 3690 تەڭگەنى قۇرايدى جانە وسى سوماعا پايدالانۋشى 10 گيگابايت، سونداي-اق 100 مينۋت سويلەسە الادى. ەڭ قىمبات تاريف قۇنى - 9690 تەڭگە. ءبىراق شارتتار ايتارلىقتاي جاقسى: شەكتەۋسىز ينتەرنەت جانە 350 مينۋتتىق بايلانىس. سونداي-اق، كومپانيادا 990 تەڭگەگە ءبىلىم بەرۋ ءتاريفى جانە جەكە «بالالار» تاريفى بار. ونىڭ قۇنى - 3990 تەڭگە. ايتپاقشى، وتباسىلىق تاريف ورناتۋعا مۇمكىندىك بار. ياعني، ءبىر ادام تولەم جاساپ، يگىلىگىن بىرنەشە ادام كورە الادى.
قىزمەت كورسەتۋ قۇنى ارزاندىعى جاعىنان ءۇشىنشى ورىندا ALTEL وپەراتورى تۇر. بۇل جاعدايدا كومپانيا تاريفتى ءوز بەتىنشە جيناۋعا مۇمكىندىك ۇسىنادى. ەڭ ارزان ستاندارتتى جيىنتىق قىزمەتىنىڭ قۇنى 3990 تەڭگە بولادى. بۇل اقشاعا ابونەنت 15 گيگابايت ترافيك پەن 100 مينۋتتىق بايلانىس الادى. ەگەر اميانىڭىز قالىڭ بولسا، وندا ەڭ قىمبات تاريف 9790 تەڭگەنى قۇرايدى. وندا شەكتەۋسىز ينتەرنەت پەن سويلەسۋگە 300 مينۋت قولجەتىمدى بولادى. 1090 تەڭگەگە جەڭىلدىكتى تاريف جانە 990 تەڭگەگە ءبىلىم بەرۋ تاريفى دە بار.
ودان كەيىنگى ورىندا - Kcell. وندا 4990 تەڭگەدەن تومەن باعاعا ستاندارتتى جيىنتىق الا المايسىز. بۇل اقشاعا 18 گيگابايت ينتەرنەت جانە 180 مينۋتتىق بايلانىس ۇسىنىلادى. وعان قوسا، قالالىق تەلەفونعا قوڭىراۋ شالۋ ءۇشىن 10 مينۋت بەرىلەدى. شەكتەۋسىز ينتەرنەتى، 480 مينۋتتىق بايلانىسى جانە قوسىمشا 40 مينۋتتىق قالالىق بايلانىسى بار ءتاريفىنىڭ قۇنى - 10990 تەڭگە
رەيتينگتە ەڭ قىمبات قىزمەتتى Beeline ۇسىنادى. كومپانيانىڭ رەسمي سايتىنداعى مالىمەتكە سايكەس، ەڭ ارزان ءتاريفتىڭ قۇنى - 5999 تەڭگە. بۇل سوما ءۇشىن وپەراتور 10 گيگابايت ينتەرنەت جانە بارلىق باعىتقا قوڭىراۋ شالۋعا 100 مينۋت بەرۋگە دايىن. شارتتارى جالپى العاندا، باسقا دا ۇيالى بايلانىس وپەراتورلارىمەن بىردەي دەسەك بولادى. ءبىراق ەڭ قىمبات ءتاريفى ءقازىردىڭ وزىندە 11999 تەڭگەنى قۇرايدى جانە بۇل اقشاعا ءسىز شەكتەۋسىز ينتەرنەتتى الا الاسىز. سونىمەن قاتار تەلەفون ارقىلى سويلەسۋگە 300 مينۋت جانە حالىقارالىق قوڭىراۋعا 30 مينۋت بەرىلەدى. سونداي-اق، ۇيدە شەكتەۋسىز ينتەرنەتتى قوسۋدى كوزدەيتىن كوپتەگەن وتباسىلىق تاريفتىك توپتاماسى بار.
تاريفتى قوسۋ كەزىندە ءاربىر وپەراتور جەلى ىشىندە شەكسىز قوڭىراۋلار بەرەتىنىن ەسكەرۋ ماڭىزدى. ايتالىق، Activ پەن Kcell وپەراتورلارى اراسىندا، سونداي-اق Tele2 مەن Altel اراسىندا شەكتەۋسىز قوڭىراۋ شالا الاسىز.
