قازاقستاندا ۇيالى بايلانىس قىمباتتاپ جاتىر: بۇل زاڭدى ما؟
استانا. KAZINFORM - قازاقستاندىقتار بايلانىس پەن ينتەرنەت تاريفتەرى باعاسىنىڭ كوتەرىلگەنىنە شاعىمدانىپ جاتىر. راسىمەن دە، كەيبىر ۇيالى بايلانىس وپەراتورلارى 2025-جىلى تاريفتەردىڭ كوتەرىلەتىنىن حابارلادى. نەلىكتەن بۇلاي بولدى جانە سيفرلىق دامۋ مينيسترلىگى باعانىڭ كوتەرىلۋى تۋرالى نە دەيدى؟

بۇعان دەيىن سيفرلىق دامۋ ۆيتسە-ءمينيسترى اسحات ورازبەك مينيسترلىك سوناۋ 2017-جىلى قابىلدانعان كاسىپكەرلىك كودەكسىنە سايكەس، وپەراتورلاردىڭ تاريفتەرىنە اسەر ەتە المايتىنىن مالىمدەگەن ەدى. الايدا وپەراتورلارمەن ولاردىڭ قىزمەتتەرىنىڭ باعاسىنا قاتىستى كەلىسسوزدەر جۇرگىزىلىپ جاتقان كورىنەدى.
«جىل سوڭىندا (2024-جىلى) حالىقتىڭ كوڭىل كۇيىن ءسال كوتەرۋ ءۇشىن باعا وسپەيدى دەپ كەلىستىك»، - دەدى ۆيتسە-مينيستر 21-قاڭتاردا وتكەن ۇكىمەت بريفينگىندە.
تاريفتەردى كىم جانە نە ءۇشىن كوتەرىپ وتىر؟
تاريفتەردىڭ كوتەرىلۋى تۋرالى بايلانىس وپەراتورلارىنىڭ ءوزى نە دەيدى؟ وكىنىشكە قاراي، Kcell/Activ باسپا ءسوز قىزمەتى Tengrinews.kz پورتالىنىڭ 14-قاڭتارداعى رەسمي ساۋالىنا ءالى جاۋاپ بەرمەگەن.
ايتا كەتەيىك، كومپانيا كەيبىر تاريفتەر بويىنشا ابونەنتتىك تولەمدى 13-جەلتوقساندا كوتەرۋدى جوسپارلاعان ەدى. الايدا كەيىنىرەك وپەراتور قولدانۋشىلارىنا بۇل وزگەرىستەن ازىرشە باس تارتقانى تۋرالى SMS جىبەردى.
بايلانىس وپەراتورلارىنىڭ رەسمي سايتتارداعى حابارلاندىرۋلارىنا قاراعاندا، كەيبىر تاريفتەر بويىنشا ابونەنتتىك تولەم 2025-جىلعى 26-اقپاننان باستاپ وزگەرەدى.
Kcell- ءدىڭ نەگىزگى اكسيونەرى - «سامۇرىق-قازىنا» قورى ارقىلى مەملەكەتكە تيەسىلى «قازاقتەلەكوم».
Beeline وسى جىلعى 1-اقپاننان باستاپ ابونەنتتىك تولەمدى كوتەردى. كومپانيا مۇنىڭ سەبەبىن ينفراقۇرىلىمعا تۇراقتى ينۆەستيتسيا سالۋمەن بايلانىستى ەكەنىن ءتۇسىندىردى. كەيىنگى ءبىر جىلدا كومپانيا 500 دەن استام بازالىق ستانسيانى ورناتىپ، 3000 ۋچاسكەدەگى جابدىقتى جاڭارتقان، 230 شاقىرىم تالشىقتى-وپتيكالىق كابەل جۇرگىزىپ، جاڭا تەحنولوگيالاردى ەنگىزدى.
وپەراتور سونىمەن قاتار ماكروەكونوميكالىق فاكتورلاردى دا: تەلەكوممۋنيكاتسيالىق جابدىق قۇنىنىڭ ءوسۋىن، ەلەكتر ەنەرگياسى تاريفتەرىنىڭ جانە ۆاليۋتا باعامىنىڭ اۋىتقۋىن دا اتاپ ءوتتى. بۇل وزگەرىستەر، كومپانيا وكىلدەرىنىڭ ايتۋىنشا، تاريفتەردى قايتا قاراۋعا ءماجبۇر ەتەدى.
Beeline كەيىنگى ءتورت جىلدا ولاردىڭ كۇردەلى قارجى شىعىندارى 300 ميلليارد تەڭگەدەن اسقانىن ايتتى.
كومپانيا سايتىندا ابونەنتتەرگە كەيىنگى بىرنەشە جىلداعى دوللار-تەڭگە باعامىنىڭ وزگەرۋ گرافيگى كورسەتىلگەن ۇندەۋ جاريالاندى. ۇندەۋ اۆتورلارى 2018-جىلعى قاڭتاردا دوللار 332 تەڭگە بولعانىنا باسا نازار اۋداردى.
قازاقستانداعى Beeline برەندى «كار-تەل» ج ش س- نا تيەسىلى. كومپانيا اكسيالارىنىڭ 75 پايىزى نيدەرلاندتىق Veon حولدينگىنىڭ يەلىگىندە. ال كومپانيانىڭ 25 پايىزى بولات وتەمۇراتوۆقا تيەسىلى.
Tele2/Altel وسى جىلعى 11-اقپاننان باستاپ كەيبىر تاريفتەر بويىنشا ابونەنتتىك تولەم مەن قىزمەت كورسەتۋ كولەمىن وزگەرتەدى. كومپانيا تاريفتەردىڭ كوتەرىلۋى جەلىلەردى دامىتۋ مەن جاڭعىرتۋعا، ولارعا تەحنيكالىق قىزمەت كورسەتۋگە جانە جوندەۋگە جۇمسالاتىن شىعىنداردىڭ، دوللار باعامىنىڭ جانە قۇرال-جابدىقتار باعاسىنىڭ وسۋىنە بايلانىستى ەكەنىن مالىمدەدى.
«وزگەرىستەر ينفراقۇرىلىمدى دامىتۋ قاجەتتىلىگىنەن تۋىنداپ وتىر. كومپانيا ءبىر بازالىق ستانتسيانى ساتىپ الۋعا جانە ورناتۋعا شامامەن 100 مىڭ دوللار اقشا جۇمسايدى. دوللار باعامىن ەسكەرسەك، جابدىق ينۆەستيتسياسى دا ۇنەمى ءوسىپ كەلەدى. 2024-جىلى Tele2/Altel قازاقستاننىڭ جەتى قالاسىندا ەسكىرگەن 3G بايلانىس تەحنولوگياسىن 4G جانە 5G گە اۋىستىرىپ، قايتا وڭدەۋ جۇمىستارىن جۇرگىزدى. كومپانيا 5G جەلىسى ەلدىڭ ەڭ شالعاي بۇرىشتارىندا دا قولجەتىمدى بولۋى ءۇشىن جەلىنى دامىتۋعا بەلسەندى ينۆەستيتسيا سالۋدى جالعاستىرىپ جاتىر»، - دەلىنگەن Tele2/Altel جاۋابىندا.
Tele2/Altel برەندتەرى «موبايل تەلەكوم-سەرۆيس» كومپانياسىنا تيەسىلى. 2025-جىلعى قاڭتاردان باستاپ كومپانيانىڭ 100 پايىزدىق ۇلەسى تاياۋ شىعىس كونگلومەراتىنا - قاتارلىق Power International Holding-كە تيەسىلى. بۇرىن Tele2 مەن Altel «قازاق تەلەكومعا» تيەسىلى بولاتىن.
تاريفتەردى كوتەرۋ زاڭدى ما؟
باسەكەلەستىكتى قورعاۋ جانە دامىتۋ اگەنتتىگى ۇيالى بايلانىس وپەراتورلارى «كسەلل» ا ق، «موبايل تەلەكوم سەرۆيس» ج ش س جانە «كار-تەل» ج ش س- نا (Beeline) قاتىستى 2024-جىلى باستالعان تەكسەرۋدىڭ توقتاتىلعانىن حابارلادى. وپەراتورلار سوت تارتىبىمەن تەرگەۋ جۇرگىزۋ تۋرالى بۇيرىقتارعا قارسى شىققان.
«سونىمەن قاتار «كسەلل» ا ق مەن «كار-تەل» ج ش س- نىڭ 2024-جىلدىڭ جەلتوقسان ايىنان باستاپ ءبىرقاتار تاريفتىك جوسپار بويىنشا ۇيالى بايلانىس تاريفتەرىن كوتەرۋ تۋرالى مالىمدەمەسىنە بايلانىستى اگەنتتىك وسى وپەراتورلارعا باسەكەلەستىك زاڭناماسىن بۇزۋعا اكەپ سوعۋى مۇمكىن ارەكەتتەرگە (ارەكەتسىزدىككە) جول بەرىلمەيتىنى تۋرالى ەسكەرتۋ جاسادى»، - دەپ تولىقتىردى ۆەدومستۆو.