قازاقستاندا پويىز بيلەتتەرى قىمباتتايدى

استانا. قازاقپارات - جەلىدە كولىك مينيسترلىگى 2024 -جىلدىڭ 1-قازانىنان باستاپ قازاقستاندىق پويىزداردىڭ بيلەتتەرىنىڭ باعاسىن 20 پايىزعا كوتەرەدى دەگەن اقپارات تارادى. Tengri Travel ونىڭ ءمان-جايىن انىقتادى.

كولىك مينيسترلىگى بۇل اقپاراتقا قاتىستى پىكىر ءبىلدىردى.

«ەلىمىزدە 140 جولاۋشىلار باعىتى جۇرەدى، ولاردىڭ 62 سىنە تاريفتىڭ ءوسۋى اسەر ەتەدى. بۇل ۆاگوندار پاركىن جاڭارتۋ، كورسەتىلەتىن قىزمەتتەر سەرۆيسىن جاقسارتۋ جانە قىزمەتكەرلەردىڭ جالاقىسىن ارتتىرۋ ءۇشىن قاجەت. سونداي-اق، سوڭعى 10 جىلدا الەۋمەتتىك ماڭىزى بار قاتىناستار بويىنشا جولاۋشىلاردى تاسىمالداۋ باعاسىنىڭ ءوسۋى (ينفلياتسيا دەڭگەيىنە يندەكستەۋدى قوسپاعاندا) جۇزەگە اسىرىلماعانىن ەسكەرۋ ماڭىزدى»، - دەپ حابارلادى ۆەدومستۆودا.

جولاۋشىلار ۆاگوندارىنىڭ پاركى 2667 بىرلىكتى قۇرايدى، ولاردىڭ 44 پايىزى توزعان.

«ۆاگوندار پاركىن جاڭارتۋدى جەكە دە، ۇلتتىق تا تاسىمالداۋشىلار جۇزەگە اسىرادى. ماسەلەن، 2023 -جىلى 118 بىرلىك، 2024 -جىلى 140 بىرلىك جولاۋشىلار ۆاگونى ساتىپ الىندى، ال 2025 -جىلدان باستاپ جىل سايىن 200 بىرلىكتەن استام ۆاگون ساتىپ الۋ جوسپارلانىپ وتىر، 2030 -جىلعا دەيىن 1200-دەن اسا بىرلىك ساتىپ الىنۋى مۇمكىن. الەۋمەتتىك ماڭىزى بار قاتىناستار بويىنشا جولاۋشىلاردى تاسىمالداۋ بويىنشا باعانى (تاريفتى) ارتتىرۋ «تەمىرجول كولىگى تۋرالى» زاڭنىڭ 12-بابىنا سايكەس جۇزەگە اسىرىلادى»، - دەپ حابارلادى باسپا ءسوز قىزمەتى.

پويىز بيلەتتەرىنىڭ باعاسى 2024 -جىلدىڭ 1-قازانىنان باستاپ كوتەرۋ جوسپارلانىپ وتىر.