قازاقستاندا ورتاشا جالاقى 16 پايىزعا ءوسىپ، 400 مىڭ تەڭگەگە جاقىندادى
استانا. KAZINFORM - قازاقستان بويىنشا اتاۋلى جالاقىنىڭ ورتاشا ءمانى 2023-جىلعى ءتورتىنشى توقساندا 393605 تەڭگەنى قۇرادى. 2022-جىلدىڭ ءتيىستى توقسانىنا قاراعاندا ءوسىم - 16,2 پايىز، ناقتى ماندە - 5,3 پايىز.
جالاقىنىڭ مەديانالىق ءمانى (جالاقى قاتارىنىڭ ورتالىق دەڭگەيى) بىلتىر ءتورتىنشى توقساندا باعالاۋ بويىنشا 259463 تەڭگە بولدى.
وسى توقساندا ورتاشا جالاقىنىڭ ءوسۋى جىل قورىتىندىسى بويىنشا قوسىمشا تولەمدەر مەن مەرەكەلىك سىياقى ەسەبىنەن ەڭبەكاقى قورىنىڭ ۇلعايۋىنا بايلانىستى.
ايتا كەتەيىك، جالاقىنىڭ ورتاشا مولشەرى ءبىر قىزمەتكەردىڭ جالاقىسىنىڭ قوسىمشا اقىسىنىڭ، ۇستەمەاقىسىنىڭ، سىياقىسىنىڭ، سالىعىنىڭ جانە زەينەتاقى اۋدارىمىنىڭ بارلىق ءتۇرىن ەسكەرە وتىرىپ كورسەتىلەدى.
ول جالاقى قورىنىڭ سوماسىن كاسىپورىنداعى قىزمەتكەرلەردىڭ ناقتى سانىنا ءبولۋ ارقىلى ەسەپتەلەدى.
