قازاقستاندا تۇينەمەگە قارسى قانداي شارالار قولعا الىندى

ق ر دەنساۋلىق ساقتاۋ مينيسترلىگى ەلىمىزدە تۇينەمەگە قارسى قابىلدانىپ جاتقان شارالار تۋرالى ايتىپ بەردى، دەپ حابارلايدى Kazinform.

«ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ اۋماقتىق بولىمشەلەرى حالىقتىڭ تۇينەمە اۋرۋىنىڭ الدىن الۋ جانە جول بەرمەۋ ماقساتىندا تۇينەمەنىڭ ەپيدەميالىق وشاقتارىن انىقتاۋ، تىركەۋ جانە ەسەپكە الۋ جۇمىستارىن جۇرگىزۋدە. وعان قوسا، تۇينەمە وشاقتارىنىڭ اينالاسىنداعى سانيتاريالىق-قورعاۋ ايماعىنداعى جەر ۋچاسكەلەرىن پايدالانۋعا جول بەرىلمەيدى»، - دەپ جاۋاپ بەردى مينيسترلىك Kazinform اگەنتتىگىنىڭ ساۋالىنا.

ودان بولەك، مينيسترلىك ادامداردىڭ تۇينەمە اۋرۋلارى تىركەلگەن وشاقتاردا ەپيدەمياعا قارسى ءىس-شارالاردىڭ ورىندالۋىن، پروفيلاكتيكالىق ۆاكسينالاۋدى باقىلايدى جانە ادام اۋرۋى تىركەلگەن وشاقتاردا پروفيلاكتيكالىق، جوسپارلى جانە قورىتىندى دەزينفەكسيا جۇرگىزەدى. حالىقپەن جانە مال شيكىزاتىن ازىرلەۋ، جيناۋ، ساقتاۋ، تاسىمالداۋ، وڭدەۋ جانە ساتۋمەن كاسىبي اينالىساتىن ادامدار اراسىندا سانيتارلىق-اعارتۋ جۇمىستارىن جۇرگىزەدى.

ادامداردىڭ تۇينەمە اۋرۋى جاعدايلارىن تىركەۋدە دەنساۋلىق ساقتاۋ ۇيىمدارى:

- ناۋقاستاردى انىقتاۋ، دياگنوستيكالاۋ جانە اۋرۋحاناعا جاتقىزۋ، ءۇي-جايلاردى (پاتەرلەردى) ارالاۋ؛

- سوڭعى ناۋقاس انىقتالعان ساتتەن باستاپ تەرىنى كۇندەلىكتى تەكسەرۋ، 14 كۇن بويى ناۋقاسپەن بايلانىستا بولعانداردى مەديتسينالىق باقىلاۋ؛

- ينفەكتسيونيست دارىگەردىڭ تاعايىنداۋىمەن شۇعىل پروفيلاكتيكا جاساۋ؛

- حالىقپەن اقپاراتتىق-ءتۇسىندىرۋ جۇمىستارىن جۇرگىزۋمەن اينالىسادى.

ەسكە سالا كەتسەك، قاراعاندى وبلىسىنىڭ توپار كەنتىندە ءۇش ادامنان تۇينەمە (ءسىبىر جاراسى) انىقتالعان ەدى.