قازاقستاندا تەگىن وتا كىمدەرگە جاسالادى

پەتروپاۆل. KAZINFORM - تەگىن مەديتسينالىق كومەكتىڭ كەپىلدىك بەرىلگەن كولەمى (ت م ك ك ك) اياسىندا ەل ازاماتتارىنا، قانداستارعا جانە تۇرۋعا ىقتيارحاتى بار شەتەلدىكتەرگە وتا تەگىن جاسالادى.

ت م ك ك ك اياسىندا تەگىن وتا:

قازاقستان رەسپۋبليكاسىنىڭ ازاماتتارىنا؛
قانداستارعا؛
تۇرۋعا ىقتيارحاتى بار ادامدارعا جاسالادى.
كومەك جوسپارلى تۇردە دە، كۇتپەگەن وقىس جاعدايلاردا دا كورسەتىلەدى.

- وپەراتسيالار مەديتسينالىق كورسەتىلىمدەر بولعان كەزدە جۇرگىزىلەدى، ول جوسپارلى جانە شۇعىل حيرۋرگيالىق ارالاسۋدى قاجەت ەتۋى مۇمكىن. قىمبات، جوعارى تەحنولوگيالىق وتالار دا بۇل ساناتقا جاتاتىن ازاماتتارعا قولجەتىمدى ەكەنىن، ياعني تەگىن جاسالاتىنىن ايتا كەتۋ قاجەت، - دەيدى دەنساۋلىق ساقتاۋدى دامىتۋدىڭ ۇلتتىق عىلىمي ورتالىعى ساراپشىلارى.

ءبىر سەبەپتەرمەن مەديتسينالىق كومەك كورسەتىلمەسە نەمەسە ناۋقاس مەديتسينالىق كورسەتىلىمدەر بويىنشا جولداما الا الماسا، ول پاتسيەنتتەردى قولداۋ قىزمەتىنە جۇگىنە الادى.

- قازاقستاندا وسىنداي ماسەلەلەردى شەشۋمەن اينالىساتىن ارنايى قىزمەتتەر جۇمىس ىستەيدى. ەگەر ماسەلە ەمحانا نەمەسە ەمدەۋ مەكەمەسى دەڭگەيىندە شەشىلمەسە، سىرقاتتار «Qoldau 24/7» موبيلدى قوسىمشاسى ارقىلى نەمەسە 1414 بايلانىس ورتالىعىنا، Telegram-داعى Saqtandyru-bot-قا جانە msqory.kz رەسمي سايت ارقىلى جۇگىنە الادى، - دەيدى ءا م س ق شىمكەنت قالالىق فيليالىنىڭ باسپا ءسوز حاتشىسى ساۋلە الجانبايەۆا.