قازاقستاندا تۇسىرىلگەن قۇسبەگىلىك تۋرالى فوتوسۋرەتتەر حالىقارالىق سىيلىقتى يەلەندى
استانا. KAZINFORM - ا ق ش فوتوگرافى قازاقستانداعى قۇسبەگىلىك تۋرالى تۇسىرگەن فوتوسۋرەتتەرى ءۇشىن حالىقارالىق ماراپاتقا يە بولدى. بۇل تۋرالى Kazakh Tourism ۇلتتىق كومپانياسى حابارلايدى.
بيىل ا ق ش فوتوگرافى كارولينا ۆوشتاسيك قازاقستاندا العاش رەت بولىپ، بۇركىتشىلىك ءداستۇرى بويىنشا ءتۇسىرىلىم وتكىزدى. ونىڭ قازاق حالقىنىڭ كونە ونەرىنە ارنالعان جۇمىستارى «Communication Arts Awards of Excellence» حالىقارالىق سىيلىعىن يەلەندى. اتالعان ماراپات دەرەكتى فوتوسۋرەت سالاسىنداعى جەتىستىكتەر ءۇشىن بەرىلدى.
- قۇسبەگىلىك بويىنشا تۇسىرىلىمدەر الماتى وبلىسىنىڭ كۇرتى اۋىلىندا جانە ىلە الاتاۋىنىڭ باۋرايىندا ءوتتى. الەم چەمپيونى اتانعان بۇركىتشىلەر، قىراندى باپتاۋعا ءوز ءومىرىن ارناعان ماماندار شەتەلدىك فوتوگرافقا قازاق حالقىنىڭ داستۇرلەرىن پاش ەتتى. كارولينا ۆوشتاسيك ادام مەن قۇس اراسىنداعى ەرەكشە بايلانىس ساتتەرىن سۋرەتكە ءتۇسىردى. ءوز جۇمىستارى ارقىلى ول تەك ەستەتيكانى عانا ەمەس، سونىمەن بىرگە عاسىرلاردان كەلە جاتقان ونەردىڭ تەرەڭ ماعىناسىن دا جەتكىزەدى، - دەلىنگەن حابارلامادا.
اقپاراتتا ايتىلعانداي، حالىقارالىق بايقاۋعا ۇسىنىلعان فوتوگرافتىڭ سۋرەتتەر سەرياسى الەمدىك اۋديتوريانىڭ قازاقستاننىڭ مادەنيەتىنە قىزىعۋشىلىعىن وياتتى.
فوتو تۇسىرىلىمگە قازاق مادەنيەتىن حالىقارالىق دەڭگەيدە بەلسەندى تۇردە دارىپتەپ جۇرگەن تۋريزم سالاسىنىڭ مەديا- ەلشىسى جانە پروديۋسەر ناديرا احونوۆا ۇيىتقى بولعان.
ۇلتتىق كومپانيانىڭ اقپاراتىنشا، كارولينا ۆوشتاسيك - فوتوگرافيا الەمىندەگى بەدەلدى «Lucie Award» سىيلىعىنىڭ يەگەرى. بۇل ماراپات «فوتوگرافيا يندۋستريانىڭ وسكارى» دەپ اتالادى.
