قازاقستاندا تۋريزم ماماندىعىن وقىتۋ فورماتى وزگەردى

استانا. KAZINFORM - تۋريزم ماماندىعىنا تۇسكەن ستۋدەنتتەر باكالاۆر دارەجەسىن 3 جىلدىڭ ىشىندە الىپ شىعادى. بۇل تۋرالى تۋريزم جانە سپورت ءمينيسترى ەربول مىرزابوسىنوۆ ءمالىم ەتتى.

- كادر دايارلاۋ بويىنشا حالىقارالىق تۋريزم جانە مەيماندوستىق ۋنيۆەرسيتەتى قازاقستاندا العاشقىلاردىڭ ءبىرى بولىپ تريمەسترلىك وقۋ جۇيەسىن ەنگىزدى. بۇل فورمات ستۋدەنتتەرگە باكالاۆر دارەجەسىن 3 جىل ىشىندە الادى، ياعني وقۋ مەرزىمىن ءتيىمدى قىسقارتۋعا مۇمكىندىك بەرەدى. وقۋ ۇدەرىسىندە دۋالدى وقىتۋ مودەلى تابىستى ىسكە اسىرىلىپ جاتىر. بۇل دەگەنىمىز وقۋ پروتسەسىنىڭ 60 پايىزى - وندىرىستەگى تاجىريبەدەن، 40 پايىزى ۋنيۆەرسيتەتتە تەوريالىق بىلىمنەن تۇرادى، - دەدى ەربول مىرزابوسىنوۆ ۇكىمەت وتىرىسىندا.

سونداي-اق مينيستر ۋنيۆەرسيتەتتە بيزنەس-پروتسەستەردى سيفرلاندىرۋ جۇيەلى تۇردە جۇزەگە اسىرىلىپ جاتقانىن ايتىپ وتىر. سونىڭ ءبىر كورىنىسى - مۋلتيمەديالىق ستۋديانىڭ اشىلۋى.

- وقۋ ۇدەرىسى اقپاراتتىق جۇيەدە تولىق سيفرلاندىرىلدى. ستۋدەنتتى تىركەۋدەن باستاپ، باعالاۋ مەن ۇلگەرىمدى باقىلاۋعا دەيىنگى بارلىق قىزمەت بىرىكتىرىلگەن. قابىلدانعان شارالاردىڭ ناتيجەسىندە بىلتىر ۋنيۆەرسيتەتتى بىتىرگەن 460 ستۋدەنتتىڭ %92,8 (428 تۇلەك) ءوز ماماندىعى بويىنشا جۇمىسقا تۇردى، - دەيدى ۆەدومستۆو باسشىسى.

بۇعان دەيىن ەلىمىزدە گيد ماماندارىن دايارلاۋى مۇمكىن ەكەندىگى تۋرالى حابارلاعان ەدىك.

ودان بولەك، تۋريزم جانە سپورت ءمينيسترى ەلىمىزگە كەلىپ الدانىپ قالاتىن شەتەلدىك تۋريستەر ماسەلەسىن شەشۋ جولدارىن اتادى.

ايتا كەتەيىك، ەلىمىزدە تۋريستەرگە ارنالعان، جاساندى ينتەللەكتىگە نەگىزدەلگەن TravelStan موبيلدى قوسىمشا ازىرلەنەدى.