قازاقستاندا تۇرعىن ءۇيدى ساتىپ الۋ-ساتۋ شارتىن راسىمدەۋ قانشا تۇرادى؟
استانا. KAZINFORM - ءسىز پاتەر، ءۇي نەمەسە جەر ۋچاسكەسىن ساتىپ الۋدى نەمەسە ساتۋدى شەشتىڭىز. ساتىپ الۋشى مەن ساتۋشى مۇلىكتىڭ باعاسىن كەلىستى، ەندى مامىلە جاساۋ قاجەت. قۇجاتتى راسىمدەۋ قانشا تۇرادى جانە قانداي قوسىمشا شىعىندار بولۋى مۇمكىن؟
Massaget.kz ءتىلشىسى ەسەپتەدى.
قۇجاتتى راسىمدەيتىن نوتاريۋس قىزمەتى
جىلجىمايتىن مۇلىكتى ساتىپ الۋ-ساتۋ شارتىن راسىمدەۋ جانە كۋالاندىرۋ قۇنى ساتۋشى مەن ساتىپ الۋشىنىڭ كىم ەكەنىنە بايلانىستى انىقتالادى.
ماسەلەن، ەكەۋى دە جەكە تۇلعا بولسا جانە ءبىر-بىرىمەن تۋىستىق قاتىناسى بولماسا، ساتىپ الۋ-ساتۋ قۇجاتىن راسىمدەۋ 12 ا ە ك نەمەسە 44304 تەڭگە بولادى. (2024-جىلى 1 ا ە ك 3692 تەڭگە)
ەگەر بۇل جەكە تۇلعالار جاقىن تۋىس بولسا (بالالار، ەرلى-زايىپتىلار، اتا-انالار، تۋعان باۋىرلار، نەمەرەلەر)، وندا قۇنى تومەن بولادى - 7 ا ە ك نەمەسە 25844 تەڭگە.
ەگەر ساتۋشى نەمەسە ساتىپ الۋشى زاڭدى تۇلعا بولسا، مامىلە 17 ا ە ك نەمەسە 62764 تەڭگە.
ەڭ تومەنگى تاريف جىلجىمايتىن مۇلىكتى يپوتەكاعا ساتىپ الاتىندار ءۇشىن - 4 ا ە ك نەمەسە 14768 تەڭگە بولادى.
«قۇجاتتى راسىمدەگەن نوتاريۋس اقىسىن كىمنىڭ تولەيتىنىن ساتىپ الۋشى مەن ساتۋشى وزدەرى شەشەدى نەمەسە ولار اقىسىن ءبولىپ تولەي الادى».
قوسىمشا شىعىندار قانداي بولۋى مۇمكىن؟
ەگەر ساتۋشى نەمەسە ساتىپ الۋشى نەكەدە بولسا، جىلجىمايتىن مۇلىكتى ساتىپ الۋعا (ەگەر ساتىپ الۋشى نەكەدە بولسا) جانە ساتۋعا (ەگەر ساتۋشى نەكەدە بولسا) زايىبىڭىزدىڭ نەمەسە جۇبايىڭىزدىڭ نوتاريالدى كۋالاندىرىلعان كەلىسىمىن راسىمدەۋىڭىز كەرەك. مۇنداي كەلىسىمدى راسىمدەۋ 5 ا ە ك نەمەسە 5538 تەڭگە تۇرادى، نوتاريۋس قىزمەتىنىڭ اقىسىن نەكەدە تۇرعان ادام تولەيدى.
ەسكەرتۋ!
EGOV mobile قوسىمشاسىندا eNotary سەرۆيسى ارقىلى جۇبايىنىڭ كەلىسىمىن ونلاين راسىمدەۋگە بولادى.
ەگەر نەكە شارتى جاسالسا، وندا كەلىسىم قاجەت ەمەس - كەلىسىمشارتتا مۇنداي قاجەتتىلىكتى بولدىرمايتىن شارتتار بولۋى مۇمكىن. سوندىقتان بۇل ءساتتى الدىن الا ناقتىلاعان دۇرىس.
تاعى ءبىر شىعىن - مەنشىك قۇقىعىن تىركەگەنى ءۇشىن مەملەكەتتىك باج. جەكە تۇلعا پاتەرلەر مەن جەكە ۇيلەردى (نەمەسە، ايتالىق، گاراج - بۇل تۇرعىن ءۇي ەمەس، ءبىراق ءجيى ساتىپ الىناتىن جىلجىمايتىن مۇلىك) ساتىپ العان جاعدايدا، سوما - 1073 تەڭگە. ال زاڭدى تۇلعا ءۇشىن، سونداي-اق جىلجىمايتىن مۇلىكتىڭ باسقا تۇرلەرى ءۇشىن سوما ءارتۇرلى بولادى. بۇل قىزمەتتىڭ اقىسىن ساتىپ الۋشى تولەيدى.
