قىرعىزستان ورتالىق ازيا ەلدەرىنە ۆيزاسىز رەجيم ەنگىزۋدى ۇسىندى
بىشكەك. KAZINFORM - قىرعىزستان مەن تاجىكستان اراسىنداعى مەملەكەتتىك شەكارا تۋرالى كەلىسىمگە قول قويىلۋىنىڭ ارقاسىندا ورتالىق ازيادا ماڭگىلىك بەيبىتشىلىك ورنادى.
بۇل تۋرالى قىرعىزستان پرەزيدەنتى سادىر جاپاروۆ ءوزىنىڭ Facebook تەگى رەسمي پاراقشاسىندا جازدى.
سادىر جاپاروۆ ورتالىق ازيانىڭ بارلىق ەلدەرى شەكارا ماسەلەلەرىن ءبىرجولا ءوزارا شەشكەنىن مالىمدەدى.
- 13- ناۋرىزدا قىرعىزستان مەن تاجىكستان اراسىنداعى 101 جىل بويى (1924 -جىلدان بەرى) شەشىلمەي كەلگەن شەكارا ماسەلەسى ءبىرجولا شەشىلدى. بۇل ەكى ەل ءۇشىن عانا ەمەس، بۇكىل ورتالىق ازيا ايماعى ءۇشىن ماڭىزدى وقيعا، ويتكەنى قازىر ايماقتاعى بارلىق ەلدەر شەكارا ماسەلەسىن ءوزارا تولىق شەشتى دەپ ساناۋعا بولادى. وسى ساتتەن باستاپ ورتالىق ازيادا ماڭگىلىك بەيبىتشىلىك ورنادى، - دەپ اتاپ ءوتتى قىرعىز باسشىسى.
قىرعىزستان باسشىسى ورتالىق ازيا ەلدەرىنە ءوزارا ۆيزاسىز رەجيم ەنگىزۋ پروتسەسىن باستاۋدى، ال باسقا ەلدەردەن كەلگەن قوناقتارعا ايماقتىڭ بارلىق ەلدەرىندە ەركىن جۇرۋگە مۇمكىندىك بەرەتىن ءبىرىڭعاي ۆيزا جاساۋدى ۇسىندى.
بۇعان دەيىن قىرعىزستان مەن تاجىكستان شەكارا ماسەلەسىن تولىق رەتتەگەنىن جازعان بولاتىنبىز.
جوگوركۋ كەنەش كوميتەتتەرىنىڭ بىرلەسكەن وتىرىسىندا قىرعىزستان مەن تاجىكستان اراسىنداعى مەملەكەتتىك شەكارا تۋرالى ءۇش كەلىسىم ماقۇلداندى.
سوونداي-اق وزبەكستان، قىرعىزستان جانە تاجىكستان پرەزيدەنتتەرى شاۆكات ميرزيەيەۆ، سادىر جاپاروۆ جانە ەمومالي راحمون تاجىكستاندا وتەتىن كەزدەسۋدە ناۋرىز مەيرامىن بىرگە تويلايتىنىن جازدىق.
