قازاقستاندا تاماق جەتكىزۋ قىزمەتىنە قويىلاتىن جاڭا تالاپتار بەكىتىلدى
استانا. KAZINFORM – ق ر س ي م تەحنيكالىق رەتتەۋ جانە مەترولوگيا كوميتەتى ق ر س ت 3988-2024 «قوعامدىق تاماقتانۋ قىزمەتتەرى. تۇتىنۋشىلاردىڭ تاپسىرىسى بويىنشا قوعامدىق تاماقتاندىرۋ ونىمدەرىن جەتكىزۋ. جالپى تالاپتار» قۇجاتىن بەكىتتى.
قۇجات 2025-جىلدىڭ 1-قاڭتارىنان باستاپ قولدانىسقا ەنگىزىلدى.
ستاندارتتى ق ر س ي م ساۋدا كوميتەتىنىڭ باستاماسى بويىنشا قازاقستان ستاندارتتاۋ جانە مەترولوگيا ينستيتۋتى ازىرلەدى.
- وسى ستاندارتتى قولدانۋدان قوعامدىق تاماقتاندىرۋ ونىمدەرىن جەتكىزۋ نارىعىنداعى تالاپتاردىڭ اشىقتىعى مەن بىرىزدىلىگى قامتاماسىز ەتىلەدى. تۇتىنۋشىلاردىڭ كورسەتىلەتىن قىزمەتتەرگە دەگەن سەنىم دەڭگەيى ارتادى جانە قازاقستان رەسپۋبليكاسىندا ازىق-تۇلىك قاۋىپسىزدىگى جۇيەسىنىڭ نىعايۋىنا ىقپال ەتەدى، - دەپ اتاپ ءوتتى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى جاننا ەسەنبەكوۆا.
مىسالى، ستاندارتقا سايكەس كۋرەرلەردە مەديتسينالىق تەكسەرۋدەن وتكەنى تۋرالى بەلگىسى بار بەلگىلەنگەن ۇلگىدەگى جەكە مەديتسينالىق كىتاپشا بولۋعا ءتيىس جانە ولار كاسىبي گيگيەنالىق دايىندىقتان وتۋگە، سونداي-اق جالپى قابىلدانعان نورمالار مەن مىنەز-قۇلىق ەرەجەلەرىن باسشىلىققا الۋعا ءتيىس.
بۇدان باسقا، قوعامدىق تاماقتاندىرۋ ونىمدەرىن تاپسىرىستا كورسەتىلگەن ورىن بويىنشا تۇتىنۋشىلارعا جەتكىزۋ كەزىندە جانە تاپسىرىستاردى بەرۋ پۋنكتتەرىندە قاپتامانىڭ تاسىمالداۋ بارىسىندا سىرتقى زاقىمدانۋىن انىقتاۋ ءۇشىن تاپسىرىستاعى ءونىمدى تەكسەرۋ مۇمكىندىگى بەرىلۋگە ءتيىس.
قابىلدانعان ستاندارت مەيرامحانالاردىڭ، كافەلەردىڭ، لوگيستيكالىق كومپانيالاردىڭ جانە كۋرەرلەردىڭ تاماق جەتكىزۋ قىزمەتىنىڭ ساپاسىن ارتتىرۋعا ارنالعان.
بۇعان دەيىن وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا الماتىلىق ەپيدەميولوگ تاماقتان ۋلانباۋدىڭ قاراپايىم ەرەجەلەرىن ءتۇسىندىرىپ بەرگەن ەدى.
