قازاقستاندا تاعى ءبىر قۇجاتتى ونلاين الۋعا بولادى
استانا. KAZINFORM - قازاقستاندىقتار تاعى ءبىر قۇجاتتى ەلەكترون فورماتتا الا الادى. بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي مالىمدەدى.
تالعات ءۋاليدىڭ ايتۋىنشا، بۇعان دەيىن نوتاريۋستىڭ اتقارۋشىلىق جازباسى تەك قاعاز تۇرىندە راسىمدەلەتىن. ونى الۋ ءۇشىن ازاماتتار نوتاريۋسقا بارىپ، قۇجاتتاردىڭ ءتۇپنۇسقالارىن ۇسىنۋى، سودان كەيىن سوت ورىنداۋشىعا جۇگىنۋى قاجەت بولاتىن.
«نوتاريۋستىڭ اتقارۋشىلىق جازباسى - قارىزدى ماجبۇرلەپ ءوندىرۋ ءۇشىن قاجەت قۇجات. ياعني بورىشكەردەن اقشا نەمەسە مۇلىك ءوندىرۋ ماقساتىندا نوتاريۋس ارنايى بەلگى - اتقارۋشىلىق جازبا جاسايدى»، - دەپ ءتۇسىندىردى ول.
ەندى بۇل ءراسىم جەڭىلدەتىلدى: اتقارۋشىلىق جازبا نوتاريۋستىڭ ەلەكترون سيفرلىق قولتاڭباسى ارقىلى ەلەكترون فورماتتا راسىمدەلەدى. بۇل قۇجات قاعاز نۇسقاسىمەن بىردەي زاڭدى كۇشكە يە.
