قازاقستاندا تابىسى جوق جاستارعا نەسيە بەرمەۋ تالابى ەنگىزىلمەك
جاستارعا نەسيە بەرۋدە شەكتەۋ ەنگىزىلمەك. بۇل تۋرالى ماجىلىستە «حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋ» تاقىرىبىنداعى پارلامەنت تىڭداۋىندا قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى، دەپ حابارلايدى Kazinform.
«اگەنتتىك نەسيە بويىنشا 90 كۇننەن استام مەرزىمدە وتەمەگەن ادامدارعا كەپىلسىز تۇتىنۋ نەسيەسىن بەرۋگە تىيىم سالۋدى كوزدەيتىن زاڭنامالىق تۇزەتۋلەر ازىرلەدى»، - دەدى ءمادينا ءابىلقاسىموۆا پارلامەنتتىك تىڭداۋدا.
ونىڭ ايتۋىنشا، قازىر مۇنداي شەكتەۋ تابىسى ەڭ تومەنگى جالاقىدان از قارىز الۋشىلارعا عانا قاتىستى.
«سونىمەن قاتار، جاستار اراسىندا پروبلەمالى قارىزدىڭ ءوسۋىن ەسكەرە وتىرىپ، 21 جاسقا تولماعان ازاماتتارعا نەسيە بەرۋ تەك رەسمي تابىسى بولعان جاعدايدا عانا جۇزەگە اسىرىلادى دەگەن تالاپتى ەنگىزۋ ۇسىنىلىپ وتىر»، - دەدى اگەنتتىك باسشىسى.
بۇدان بۇرىن حابارلانعانداي، پروبلەمالى كرەديتتى كوللەكتورلىق ۇيىمدارعا ساتۋعا تىيىم سالىنادى.
