قازاقستاندا سەيسمولوگيا تۇرعىسىنان قاۋىپتى وڭىرلەر كوبەيدى

قازاقستاننىڭ باتىس وڭىرلەرى سەيسمولوگيا تۇرعىسىنان قاۋىپتى ايماققا اينالىپ بارا جاتىر. بۇل تۋرالى ءماجىلىس دەپۋتاتى ەدىل جاڭبىرشين ايتتى، دەپ حابارلايدى قازاقپارات ءتىلشىسى.

депутат
Фото: ҚазАқпарат

«سەيسمولوگيا تۇرعىسىنان قاۋىپتى جالعىز الماتى قالاسى مەن الماتى وبلىسى عانا ەمەس. سونىمەن قاتار، اتىراۋ، ماڭعىستاۋ، اقتوبە، قىزىلوردا وبلىستارىنىڭ اۋماعى دا سەيسمولوگيا جاعىنان قاۋىپتى. بۇل وڭىرلەردە قارقىندى تۇردە مۇناي ءوندىرۋ جۇزەگە اسىرىلعان سوڭ، جەر قاباتىندا بوس ورىندار پايدا بولدى. كەز كەلگەن تابيعي جەر سىلكىنىسى تەحنوگەندىك دۇمپۋگە ۇلاسۋى مۇمكىن»، - دەدى ە. جاڭبىرشين ءماجىلىستىڭ ەكولوگيا جانە تابيعاتتى پايدالانۋ ماسەلەلەرى جونىندەگى كوميتەتىنىڭ كەڭەيتىلگەن وتىرىسىندا.

وسى ورايدا بۇل ماسەلە اسا ماڭىزدى ەكەنىن جانە مۇناي- گاز كەن ورىندارىن قارقىندى يگەرۋ ورىندارىندا پروبلەما بولۋى مۇمكىن ەكەنىن ايتتى.

«سوندىقتان ءبىزدىڭ وڭىرلەردەگى قازىرگى شىنايى گەوديناميكالىق جاعدايدى كورگىمىز كەلەدى. سەبەبى تۇركيادا بولعان اپاتتان كەيىن بۇل تاقىرىپ وتە وزەكتى. ماسەلەن، اقتاۋدا تۇرعىن ۇيلەر سالىنعان كەزدە قۇرىلىس نورمالارى جانە ەرەجەلەرىندە 6 بالل دەڭگەيىندەگى جۇيە كورسەتىلگەن. بۇل تۇرعىدا ارناۋلى ينستيتۋتتارداعى بارلىق مالىمەتتى قاراستىرىپ، ءتيىستى دەرەكتەردى جيناقتاۋدى سۇرايمىز. ياعني ەلىمىز اۋماعىندا جەر قاباتىندا بولىپ جاتقان وزگەرىستەر قانداي قاۋىپ ءتوندىرىپ تۇرعانىن تىڭعىلىقتى زەرتتەۋ كەرەك»، - دەدى دەپۋتات توتەنشە جاعدايلار مينيسترلىگى وكىلدەرىنە قاراتا ايتقان سوزىندە.

ءوز كەزەگىندە توتەنشە جاعدايلار ءمينيسترى سىرىم ءشارىپحانوۆ ەلىمىزدە سەيسمولوگيا ينستيتۋتى بار ەكەنىن، عالىمدار ءتيىستى كارتانى جاساعانىن ايتتى.

«الماتى قالاسىنىڭ اۋماعىندا وسى جۇمىس اياقتالدى. ول كارتانى قۇرىلىس نورمالارىمەن اينالىساتىن جەرگىلىكتى ورگانعا تابىستادى. قازىر بۇل باعىتتاعى جۇمىستار شىعىس وڭىردە ىسكە اسىرىلىپ جاتىر. سونىمەن قاتار، ينستيتۋت ماماندارى ەلىمىزدىڭ باتىس وڭىرلەرىنە بارىپ، اۋقىمدى زەرتتەۋ جاسايدى. شىنىمەن دە بۇل وبلىستاردا مۇناي- گاز كەن ورىندارىن يگەرۋ سالدارىنان جەر قاباتىندا بوس ورىندار پايدا بولىپ جاتىر. سوندىقتان باتىس وڭىرلەردە دە سەيسميكالىق جاعداي كۇردەلى. اتاپ ايتقاندا كەن ورىندارىنداعى جاعدايدى باقىلاۋدا ۇستايمىز»، - دەدى مينيستر.

سوڭعى جاڭالىقتار